السلام عليكم
هذي من قصايد المبدع مشعل عوض
صلو علي النبي
الغاليه ،
ياليل لاتقسى عليّ بمساريك=نفسي جزوعه والطواري تجيها
ياليل اماري بك واحبّك واغنّيك=وابدا مشاويري معك وانتهيها
ياليل قلّ للغاليه كيف اجاريك=يمكن تسولف لك وسولف عليها
ترى سوالفها عن الناس تغنيك=حتى السوالف من دلعها تبيها
لاسولفت كنّ الخزاما حواليك=والشيح والقيصوم منها وإليها
واليا اسكتت ضاقت عليك المساليك=بالك تضيّق خلقها وتعصيها
يكفيك تسمع صوتها لو تناديك=ويكفيك ضحكتها وهزّة ايديها
لك الفخر دام الغلا من تواليك=وانا بعيد وخافقي مهتويها
ياليل بلّغها سلامي وتعطيك= ردّ السلام وقلّ تراي احتريها
هذي غلاي ومهجتي يوم اوصيك=ابيع عمري لاجلها واشتريها
ياليل ليه الصمت؟ ياليل وش فيك؟=خلاص روّح منت مكلوف فيها
بديت أغار وصابني منك تشكيك=حسبي على الفرقا وحسبي عليها
اليكم بـ الثانيه
معك السوالف غير !
معك السوالف غير ومقابلك غير=الله عطاك من السوالف حلاها
لك في خفوقي حبّ ثاني وتقدير=ومكانةٍ تصعب على من بغاها
ولك في عيوني ياعيوني مشاوير=ولك من فياض الشيح نسمة هواها
ان جيتني جبت الفرح والتباشير=وان غبت عن عيني يجيها بلاها
غالي بعيني لو بدا منك تقصير=ماتدري انك ياحياتي غلاها؟؟
غلاك وسط القلب من غير تفسير=والعين ماغيرك حبيب(ن) ملاها
ألغيت من فكري جميع الغنادير=يحق لي يوم افتخر وآتباها
يفزّ قلبي بين الاضلاع ويطير=شوفك هنا روحي وقربك ماها
تفداك روحي ماحسبت المخاسير=وتفداك ناس(ن) همّها في لغاها
تجني عليّ ان قلت (تصبح على خير)=كلمه واحسّ الروح تطلع معاها
وسلامتكـم / مشعل عوض
لحظــه
مخـرج !
تدري وش اللي على فرقاه ذابحني؟=شماتة الناس عدوانـي وعدوانـه