من عقب فرقا صاحبي النوم ما طاب=أسهر طوال الليل والناس ممسين
يا جعل يسقى يومها قرب الأهداب=واليوم مدري يا حمد وينها ألحين
اتعبت رجلي بالمسير بكل مرقاب=ياعين كفي من الدمع لا تهلين
الله يعين القلب بفراق الأحباب=وشلون بنسى صاحبي داعج العين
من عقب ما دبر وراح مني وغاب=ماغير أجر الصوت وأصفق لي كفين
أجلس لحالي ضايق مسكر الباب=والنفس تزهق يا حمد قومها الشين
كني سجين(ن) مسجنه تحت سرداب=يا عزتي لي لا غدى الليل ليلين
يارب ،، يا رحمان ،، يا خير وهاب= يالله عسى قاسي الليالي لي تلين
ألطف بحال إللي من الهم منصاب= كنه على هالحال شهور وسنين
أونّ ونين مات من لقصة الداب=وأحاتي محاتى اللي ضيّع ملايين
يا رب أنا عبدك ولا خاب طلاب= إنك ترد الروح من شين إلى زين
أتمنى أن تنال إعجاب الجميع
تحيتي
فالح الهاجري