شـوارد الأفكـار لا تمتحـنّـي ***يا الله عسى ما للشوارد شريـده
ياليتها فـي خاطـري تستكنّـي*** القلب هايـد والجـوارح مهيـده
خافي من الله لا تخافيـن منّـي *** يا مشغلتنـي بالعلـوم الجديـده
اللي شحنك من الطواري شحنيّ *** ولا لك عليّه حق شرع وعقيـده
أقرا آية الكرسي على كلّ جنـيّ ***إليا ربطتـه بالحبـال الجويـده
وأفك ريقي بالرجـاء والتمنّـي *** وأمسي على قول الهقاوي بعيده
وحلمي خليط ألوان وردي وبنّـي *** فقير وأحـلام الفقـارى عديـده
يسوقني للشعر رمـح المطنّـي *** أكتب براس الرمح جمله مفيـده
ولاهوب والله من طرب يوم أغنّي *** مهموم وأطقّ الحجـر بالحديـده
أبدع قصيده كلّ ما قمـت أونّـي *** سويّت لي مع كل ونّـه قصيـده
ولا زلت ألوّح للبشاير لـو أنـيّ *** مدري متى حزني يغلّق رصيـده
في فزعة المعبود ما خاب ظنّـي *** لا خاب ظنّي في مكـارم عبيـده
الله يوفقنـي وأعيـش متهنّـي ***وآخذ من الأيام فرصـه سعيـده