السحاب اللي جذبني بارقه لحظـة وصولـه=واستثار الشوق عيني بالنظر حتـى سرقهـا
بارق الخير انتشا واشعل سمانا في حلولـه=والسحايب ممطره والنبته أخضّـرت ورقهـا
وازهرت ذيك الفيافي وانبتت عقب المحولـه=والغيوم الممطره هلت على الـوادي غدقهـا
الخزاما والنفل والـورد والريحـان حولـه=والنسيم برقته داعب هـوى الـدار وعبقهـا
ديرتي كل الغلا والعشـق واحـلام الطفولـه=ديرتي قلب الحنان لكل رجـال(ن) عشقهـا
شاعر(ن)حط الرحال وبارضها نـوّخ ذلولـه=عاشقن يروي ضما نفسه يبا يطفي رمقهـا
شاعر(ن)يرسم غلاها بالقصيد اللـي يقولـه=شاعرن حس بغلاها والدفـا ليـن احترقهـا
شاعر(ن)يطري عليه العشق ويصور ميولـه=ان تنهت من غلاهـا وان تمناهـا شهقهـا
الكرم والجود وارجال(ن) لها صوله وجولـه=طبع هلها ما اختلف من يوم ما ربي خلقهـا
القصور الشامخـه تبقـى معالـم للبطولـه=والجبال الشم تبقـى ذروة المجـد وطرقهـا
من شعاع الشمس تلبس ديرتي ثوب الرجوله=وترسم بصدر الثرا مجد البطوله من شفقهـا
والقمر يحلـم يلامـس خدهـا ولا يطولـه=والغيوم تسافر بـروس الجبـال وتعتنقهـا
لاظلم الليل بسماها والزمن ثـارت خيولـه=نخوة اليامي تهـز اجبالهـا لامـن زعقهـا
شيخنا لامن وقف قصر(ن) يشرفنـا مثولـه=نمتثل في حكمته وبكـل كلمـه قـد نطقهـا
ان جلس كلن جلس وان قام كلن وقفوا لـه=شيخنا من فطنته محاسنـه ماحـد لحقهـا
وغمرنا لامن مشى فيه الطناخـه والفحولـه=يكسر اوجيه العدا واقلوب عدوانـه محقهـا
لابتي صبيان يام وعزوتي في كـل صولـه=واحمد الله واشكـره ربـي بعزتهـا رزقهـا
في الحميا والوفا واذكارهم فـي كـل دولـه=وانشدوا الاتراك عنهم واليمن واللي سبقهـا
يكفي ان (راكان)منا والزمـن يذكـر فعولـه=ويكفي (بنيان)منـا والرمـاح اللـي دلقهـا
ويكفي (الهايج ) بفعله في زمان زاد هولـه=ويكفي ان حن يام نحتل القـلاع وانخترقهـا
قصيده رائعة وقوه في الجزاله
تقبل اعجابي