غيبتك لو هي دقيقـه تعتبـرصـدّه=الوقت دونك سجن وغيابـك اسياجـه
لا تعتذر لي ترى ماعـاد فـي شـدّه=اعيد حكي ٍ يكـود الصـدر مخراجـه
دامه يوصـف بجـود ابيـك وبجـدّه=وشلون تبخل على المجروح بعلاجـه
ووشلون قـاوااك قلبـك رده وصـدّه=مع انه بيّن عليه الضعـف والحاجـه
ياقـو قلبـك بــرد ايميـنـك وردّه=بخلت بمصافحـه وارهيـت بحراجـه
لو ماسقى غيم عينه جرهـدي خـدّه=تراه يبكـي وقلبـه يلحـق اخلاجـه
ولو شفته يمازحك تـراه مـن جـدّه=الضحك عن درب ضيق الصدر ماعاجه
غير الغلا والوله عليـك وش حـدّه؟=يـادرب ليلـه ويامسـراه وسراجـه
كنّه يعرفـك قبـل يلقـاك مـن مـدّه=مع ان مابينـك ومـا بينـه امواجـه
هواك بـدو ٍ نـووا للقلـب بالشـدّه=ورياض قلبي لشوف البـدو محتاجـه
والوصل..بحر ٍ متى انت بتسمح ابمدّه=السيف صبري وبحرك شح بامواجـه
قصيدي اللـي قريتـه واللـي اعـدّه=قديـم لا يزعلـك معنـاه واخراجـه
وفراغ قلبي غلاك ارهى علـى سـدّه=ليتك تشوف الغلا وابراجـه وعاجـه
اقوى رياح العـذل مـا تقـدر تهـدّه=والا الجفا لو تنفـس هـدم ابراجـه
تغانـم الوصـل لـن البعـد لابــدّه=ياتيك في يوم ثـم ياخـذك بادراجـه
اللي لي انـك تليـن وتتـرك الشـدّه=واللي لك اني ما سولف بك لهراجـه
ولاني بزعلان واللـي نرتجـي مـدّه=يا باب قلبـي ويـا قفلـه ومزلاجـه
زعلة تغلي ومـن تزعلـه مـن قـدّه=ما دام كـل ٍ يبـي دربـك ومنهاجـه
غالي وتبخل علـي وتطّـول الصـدّه=الله يسامـح غـلاك ويلعـن الحاجـه
للشاعر : مـحـمــد بــــن حــمـــد بــــن فـــطــيــس الــمــري