السلام عليكم ورحمة الله وبركاته
اعفو عن الضامي ترا هده القيض = وش عاد باقي والضما هد حيله
يالله عسى تخلف على العبد وتعيض = من غير وجهك لا ضما يشتكيله
حفيت سمارينا بكثر المراكيض = ورا السحابه والسحابه بخيله
متى نشوف العد مليان ويفيض = ومتى تربع ذالديار المحيله
يا حضيض وينك ما تقعدت يا حضيض = ازريت اشيلك بين ميله وميله
حض ٍ مريض وما نفع فيه تمريض = قصّر بمدات الوجيه الطويله
اقلب احساسي على الحلم والغيض = وادور السجه ولابه وسيله
شفت الزمان يقول ذا غيض من فيض = عقبه دريت ان الحكايه طويله
اطعوننا باحساننا خير تعويض = ونفوسنا بارض الجمايل قتيله
وعديت في رجم ٍ به الخاطر يهيض = صار يتحرا جيتي كل ليله
افوض همومي على الرب تفويض = ما ضاق من ربه بهمه كفيله
لكن مدام وجيهنا عادها بيض = نسجد لوجه الله ونحمد جميله
تمـــت بالصــــلاة على رســـول الله ,,
مع تحيات الغناوي..