لا تسل عن ضيقة أيامي وقلبي لا تمره
ضاعت دروبك على اخر ليل وجروحي عطايب
وان لمحت اسمي ترفّق به وبادله المبره
كثر مابادلك شوق وكثر ما ودّعك هايب
لك على يمة عروق القلب يالمغرور جره
ماتواريها السنين ولا تغيرها النوايب
والله ان قربك يسر الروح وفراقك مضره
وأنت علّة خافقي وأنت القريب من القرايب
ماقدرت أتوب عن ذكرك وعن حلوك ومره
ليه عن ذبح الغلا ياصاحبي مانته بتايب؟
هاك ميزان الجروح وقيسها ذرة بذرة
ماوزنت الا غلاك ولا طعنت الا الحبايب
كل مايطري علي ظلمك تشب الكبد حره
كن في صدري رماح القوم وسيوف وحرايب
كيف أبنسى ليلة زعزعت قلبي من مقره
أنفرت كبدي وخفاّقي غدا قبر ونصايب
هلت دموعي وحلّفتك بربك الف مره
يابن آدم خف من الله ماورا ذبحي كسايب
أنت شخصٍ ماقدرت أستوعبه خيره وشره
من عرفتك والدموع دموع والخفاق ذايب
لا تصدق كذبة الأيام في وجه المسره
بسمة في عين طفل ودمعة في عين شايب
وان تذكرت الهنوف اللي على صوتك تشره
ضمها في صدرك الموحش وعرّضه الهبايب
أنكسر حلم الليال وطاحت نجوم المجره
أبتدت شمس وتوارت شمس وجروحي عطايب
وأنت
أنت
أنت ماتدري ولاعندك من الاحساس ذرّه
أشهد ان مصيبتى بك من عظيمات المصايب
02-12-2009, 11:45 PM
العرض العادي
