رديـــّـــه بين ( سلمان بن ضيدان و محمد بن شارع الحبيشي ) !!

سلمان بن ضيدان · #1 24-08-2010, 08:34 AM

السلام عليكم ورحمة الله وبركاته
هذي قصيده موجّهه لي من الشاعر / محمد بن شارع بن حويل آل سارحه !!
وكنت ما راح أنزلها هنا لأنها قصيده تعتبر من ضمن القصايد الخاصه
لكن قالي أبو شارع لازم تنزّلها ونزّلتها ..!

يقول محمد :

قال الحبيشي وأعتمد في بنوده = والمدح له غايه ودربه رشادي
الطيب كايد بس حنا نكوده = حنا خلقنا للمراجل شدادي
سلام يالحثلين والعلم كوده = وإعداد ماشب الفتيل الزنادي
أهل القنا والسيف وأهل محدوده = لا ثار دخان الورا والهدادي
وأهل الكرم لاشح بالوقت جوده = مدّاتهم تغنيك عن كل زادي
فيهم ولد ضيدان مشجع جدوده = في وقتنا هذا ووقت الطرادي
الشاعر المبدع وأنا من شهوده = فإبداعه الشعري وفي الإجتهادي
وإليا نشدني واحدً عن جهوده = أجاوبه وأظفي عليه إعتمادي
ياللي عجبك الدرب ويّا وروده = وأمسيت بدروب المطر والبرادي
الدرب بأثره والديَر في حدوده = والطيب دولتها وهي بأزديادي
سلمان لامن ضاق حنا جنوده = من بيننا رفقه ودم ومبادي
وإليا زعم عايل يقظب حدوده = يوسم على حاجبه لاصار غادي
وسلمان درعي لا غدا العلم جوده = ولا العيينه يوم قدح الزنادي
وختامها في ذكر جده و زوده = صلّو على من سار بالدين هادي

قلت أنا :

قال المعيضي يوم ورّد عدوده = الله يبارك من بالأيمان جادي
جتني مراسيلك ببشر وحموده = من عقب ما جاني بشيرً ينادي
جتني رساله طيبها طيب فوده = وأنا لزوم أردّها فإبتعادي
يالبارق اللي قام يسبق رعوده = أشوف سيلك سال في كل وادي
غيثً ومنْه العشب يخضرّ عوده = ويفوح منه ريح مسكً و كادي
صيت الحبيشي يوم جتني مدوده = متوارثه بالمدح والطيب سادي
أقول له محدً يزودك بزوده = الجود فيكم والكرم شي عادي
حتى الشكاله من عصورً شروده = ولك لابتً ما مثلها بالعبادي
رَبع الشهامه لبسهم ما يسوده = غير البياض ولا ينوشه سوادي
الطيب فيهم ذايعً في حصوده = والفعل الأشهم ذاع في كل رادي
يا صاحبي شفني يمينً قصوده = في لازمك تخدمك صوب المعادي
أنا لك الشاهد على ما تجوده = شاعر ولا مثلك شبيه ومرادي
لا جيتني كن القبايل وفوده = من ثقل قدرك فوق الأوزان زادي
واللي مع أهل العرف بيسوق ذوده = مهما قنا ندري بأنه حيادي
يقولها منهو يحكّم ردوده = يوم أكثر العربان نازل وغادي
يا جعل شهر الخير دايم تعوده = وتعيد ضمن الناس كل العَيادي !!

وسلامتكم !!

محمد بن صبحان · #2 24-08-2010, 08:51 AM

الله الله لا هنت يا بو ضيدان على اطلاعنا على جديدك وصح الله لسانك وبيض الله وجيهكم

انت و ابو شارع(( وابداع في ابداع)) والله لا يحرمنا من الدرر الي تقدمها للمنتدى من خلال

المحاوره و من خلال الشعر النبطي!

ولا هنت على المجهود الطيب

وتقبل مروري يا ذيبان!