على الهون ياجرح المفارق وضيق البال
على الهون ياهم(ن) سطابي وقدرته
أعزك لوانك جرح ومجاهدك قتال
وروضت جسمي لاجل سقمك وصبرته
لاجل من ملك قلبي من الجال لين الجال
وفجيت له باب(ن) عن الناس سكرته
وحطيت له عن شمس قيظ الغرام اظلال
وشيدت له بيت(ن) بقلبي وعمرته
عشقته ودللته وجريت له موال
وتخيرت قربه ليتني ماتخيرته
رعى ريف قلبي لين صار الحشا مدهال
وعن مدهله جنبت غيره وذيرته
سقيته من عدود الغلا والغرام ازلال
بعد ماجذب من دم قلبي وصدرته
اداري عليه من الزعل وازعل العذال
وخطاه ان كبر في عين غيري تصاغرته
ترافقت أناوياه من يوم كنا اطفال
تكون غلاه بوسط قلبي وكبرته
قبل مايغطي ليله المنتثر بالشال
سرقت الكرى من نون عينه وسهرته
نقش كل حرف(ن) من حروفي على السلسال
تباهى بها واغاظ ناس(ن) مجاكرته
كتبت القصايد في عيونه على اليامال
وليامرني صوت النواخذ تذكرته
تكاثر علي الله يجازيه كيف الحال
وانايوم اسوق العمر له ماتكاثرته
بعدكل هالتقدير والحب والاجلال
تغير وهقواته علي مغيرته
لبسته ثياب الغطرسه لين جا يختال
وكبر في عيونه يوم الاوهام غررته
واذا السالفه ضحك ومهازل ولعب اطفال
خبطت الغصن لين ابرق الريش طيرته
خلصنا وقفلنا الصناديق بالاقفال
ومن جور حكمه كامل القلب حررته
على الهون ياجرح المفارق وضيق البال**
على الهون ياهم(ن) سطابي وقدرته**
15-10-2012, 01:09 AM
..~
العرض المتطور
