|
سعيت وشفت بالدنيا غرايـب - عبدالرحمن السديري
سعيت وشفت بالدنيا غرايـب=إمن أوّلها إلى آخرها غريبـه
وبدالي من تجاريبي عجايـب=يحار الفكر فيها وتغـدي بـه
كثير العمر فات ورحت شايـب=على وجهي وراسي عم شيبـه
تعرّضت الحياه إبـلا ركايـب=صبرت ويسّر الله ما احتريبـه
لقيت الصبر حصنٍ به جذايـب=إتساعد هالجذيبـه هالجذيبـه
عرفت وشفت عدلات ومعايب=أو عانيت الدهر مـره وطيبـه
حياة الناس من أولها نهايـب=كبير الحظ ربـه يعتنـي بـه
رفيع العرش حـلال الكرايـب=من اخطا جانبه عاظب نصيبـه
وتحاشيت المصايب والمصايب=ولو جنّبت عنهـا تبتلـي بـه
إلى صدت عن اوجيه القرايب=تهون وجانب الله تحتمي بـه
كثير المجد ما هو بالغصايـب=إدروب الخير صعبات وصعيبه
وكثيرات المحايـل والطلايـب=تُعورك والنّقاء واكب صحيبـه
إلى هبت معاصيـر الهبايـب=تريّث وأشهب الذّيب ايعدي به
وإلى اشتدت عظيمات النوايب=وضاق الوقت وابليس اولعيبه
بدو بالجو وإطيـور الزرايـب=إتخامرها الشكوك ومستريبـه
عليك البحث عن زمل الجلايب=وخلان الرخـا بالـدار سيبـه
ميادين الترف حـد النصايـب=لبيب العقل صايبهـا يصيبـه
إزمام المرجله شـد العصايـب=ونومات الضحى عنوان ريبـه
يجود الزرع من جود الرقايـب=ويفوت الزرع من كثر اتحسيبه
ولا يجدي عن الحظار غايـب=ولا يكفي عن الطيـب طنيبـه
ولا ينفعـك بـرك بالنجايـب=نهار الجـد غلطاتـه رهيبـه
إذا فرّطت واجهـت الغلايـب=كثيرات الحسايف تهتنـي بـه
إدروب الخير من ربك وهايب=مع المسعى عسى ربك يجيبـه
إحزام القد وإحبـال النجايـب=إذا شديتها صبـت الضريبـه
بجمع الشمل تعتـز الحرايـب=وبالفرقة تعـاب أكبـر معيبـه
يفوت الوقت والكسلان سايـب=عن الطولات شوفاتـه قريبـه
إذا قل الحيـا فالعقـل ذايـب=وإذا هان الشرف دنياك خيبـه
وإذا وجه الأمانه صار غايـب=ترى الدنيا وما فيهـا عطيبـه
ديارٍ عامرات أضحت خرايـب=شرفها بالتواريخ إنحكـي بـه
تمادوا واخلفوا كـل النوايـب=نتايـج فعلهـم وردوا قليبـه
قرينا وافتهمنـا كـل صايـب=وشفنا واستمعنا قـول غيبـه
عسى النعمى توفّـر للحبايـب=حبايبنـا ودارٍ ننتخـي بــه
سقاها وبل همـال السحايـب=وصلى الله على مرسال غيبـه
التعديل الأخير تم بواسطة مفلح ; 15-02-2005 الساعة 02:24 PM
|
17-02-2005, 02:39 AM
العرض العادي
