إهداء الى ربان المنتدى ابو فيصل

[ابوحمد الشامري]

هذه القصيده لشاعر المعروف مقحم الصقري وهو غني عن التعريف رحمه الله وقصيدته المسماه بخطوا الولد شاعت بين الناس منذ القدم وسميت بالقصائد الشيخات وهذه القصيده الشيخه أهديها للاخ العزيز ربان المنتدى أبو فيصل تقديرا لجهوده في قيادة منتدى قبيلتنا الغاليه:

يا الله يالمطلوب يا والي الاقدار =إنت الذي مدات جودك لطيفه

يا الله يالمعبود عاون هل الكار= تحل شطاتٍ عليهم كليفه

اللي مجالسهم بها بن وبهار= ونجرٍ يصوّت للهجافا رجيفه

مكارمٍ للضيف أصيلات وكبار= ومفطحاتٍ في صحونٍ نظيفه

يا مزنةٍ غرّا من الوسم مبدار=اللي جذبنا من بعيدٍ رفيفه

تومر على كل المفالي بالامطار= تصبح بها خدان ربعي مريفه

غب الحيا فاحت بها ريح الازهار= تخالف النوار مثل القطيفه

ترعى بها قطعاننا سر وجهار= ترعى زماليق الفياض النظيفه

قطعاننا يا ما رعن دمنة الدار=في ظل مروين الغلب والرهيفه

ترعى بضف الغوش بقصاف الاعمار= تقطف زهر مرباعها مع مصيفه

في ضفّة الله ثم جبرٍ وجبّار=خيّالةٍ يوم الملاقا عنيفه

ترعى بها الوضحا من الذود معطار=غبوقه الخطار عجلٍ عطيفه

يبني عليها بنية اللُّبْن لجدار=عقب الضعف راحت ردومٍ منيفه

ما هي حكايا مسردٍ عقب ما نار =اللي نكس واطراف رمحه نظيفه

إن سوهجوا عنها قليلين الابصار =من دونها نروي السيوف الرهيفه

الصبر مفتاح الفرج عند الاذكار=ومن لا صبر تصبح أحواله كسيفه

خطوا الولد مثل البليهي إليا ثار= زودٍ على حمله نقل حمل إليفه

البليهي: الجمل القوي الذي يحمل على ظهره حمل جملين.

وخطوا الولد يقعد على موتت النار= مع العرب يشبه لخطوا الهديفه

وليا بخصته ما يجي ربع دينار= صفرٍ على عودٍ تضبّه كتيفه

صفر على عود : اي الرجل يأتيه الولد وهو كبير في السن لا يستطيع الاهتمام بولده مع كبرسنه.

وخطوا الولد يا مال قصاف الاعمار= لا نافعٍ نفسه ولا منه خيفه

وخطوا الولد مثل النداوي إليا طار= صيده سمين ولا يصيد الضعيفه

ورجلٍ بلا ربعه على الغبن صبار=يمنى بلا يسرى تراها ضعيفه

حنا كما المشخص عن الصرف ما بار= بالوزن يرجح والمصاري خفيفه

ألا ومع هذا لك الله لنا كار=عن جارنا ما قط نخفي الطريفه

حنا نرى في زلّة الجار لو بار= نِضحك حجاجه بالعلوم اللطيفه

نرفى خماله رفية العش بالغار = ونودع له النفس القويه ضعيفه

ولا نبدي الخافي إلى صار ما صار= يفلج قصير البيت لو بان حيفه

أحدٍ على جاره بختْري ونوّار=واحدٍ على جاره صفاةٍ محيفه

الجار لا بدّه مقفي عن الجار= كلٍ بجيرانه يعد الوصيفه

نكرم إسبال الضيف حقٍ وتعْبار= لا من ولد العفن شح برغيفه

لا بدها ترجع تواريخ واذكار= وتبقى لدسمين الشوارب وظيفه

،،،،،،،،،،،،،،،،، تحياتي ،،،،،،،،،،،،،

[ابن مكتوم]

يعطيك العافيه يا ابو حمد الشامري وصح لسان الشاعر
مقحم الصقري

ويستاهل ربان المنتدي على قولتك ابو فيصل


بن مكتوم

[اطياف الماضي]

ابوحمد الشامري
صح لسانك ولسان الشااااعر

يعطيك العافية ويستااهل ابو فيصل


تحياتي

[المستشار]

مشكور يا بوحمد الشامري على المشاركة الطيبة مثل أصلك الطيب

أنا عدلت كما رأيت على المشاركة لتكون بالشكل الحالي

تصدق إني سمعتها كنشيد لبعض الشباب في شريط وعجبتني حيل وإنشالله راح أتعلم كيف تسجيلها على ملف صوتي وراح أضعها في المنتدى علشان خاطر عيونك والحاضرين.

وهي فعلا من القصايد الشيخة وفيه بعد قصيدة الشيخة ثانية وبإذن الله راح أدورها وأجيبها لكم .


تحياتي / المستشار

[ابوحمد الشامري]

مرحبا ألفين بابن مكتوم وابو فيصل يستاهل القصيده واللقب والقيادة

تحياتي

[ابوحمد الشامري]

أشكر الاخت أطياف الماضي على مرورها وابو فيصل يستاهل كل خير

[ابوحمد الشامري]

لاهنت يا ابو فهد على الجهد الطيب وتسلم إعيونك وابو فيصل يستاهل أكثر من

كذا .

تحياتي

[الأدوح]

لاهنت يابوحمد على القصيده الهادفه ويستاهل ابو فيصل جعلك تحيا انت وياه0000000000000000000000000000000000000000000000 0000000000000
اخيكم الادوح

[ابوحمد الشامري]

مرحبا بخوي العزيز الادوح الذي يتميز دائما بالابداع والتألق والى الامام يا

الادوح ويستاهل ابو فيصل .

تحياتي

[admin]

مقبوله يا بوحمد والله لا يهيينك علي كتابتك ونقلك لهاذي القصيده وبيض الله وجهك وصح لسان الشاعر

وشكرا للاخوان الله يعطيكم العافيه