وحيدة السعودية ( عيدهـ الجهني ) << شاعرة المليون .

[الـشـاجـي]

أنـا يانـاشـدٍ عـنّـي بـدويّـه
على روس التّـلاع أرْعَـى حلالـي

تَحَمّـلْـت الصّمـيـل بمهمهـيّـه
تقاصـر دونهـا عـزم الرّجـالـي

تناديـنـي تحسّبـهـا خَـزِيّــه
وأنا أشـوف البـداوه راس مالـي

وأشـوف العمـر لـذّاتـه بفـيّـه
بهـا تِركَـى علـى النّـار الدّلالـي

ولامِـنّـا تقابـلـنـا عـشـيّـه
زهم عمّـي علـى الفنجـال خالـي

ونادى فـي طويـل الحِـسّ هيّـه
نبـي نسمـع قصايـدك الجزالـي

وجِبْت القاف مـن نفـسٍ رضيّـه
على بحر ( الهجيني ) و ( الهلالي )

أمِـدّ الصّـوت مانـي مستحـيّـه
مبـاحٍ بالخـلا واللّـيـل خـالـي

ولي بالدّرب يـوم أمشـي خويّـه
عصاي اللّي يمينـي عـن شمالـي

إلا مِـنْ لاح لـي ذيـب الرّعـيّـه
تناولـتـه بـهـا يـاهُـمّ لالــي

غديـت بحدّهـا كِـنّـي سـريّـه
تزهّـب كِـلْ سـاعـه للقتـالـي

قِنِـعْ سرحـان يشبـع مـن يديّـه
وعـوّد مقـويٍ يَــمْ الطّـوالـي

حيـاةٍ رغــم شدّتـهـا رخـيّـه
شربناهـا مـرار وصـار حـالـي

بها عِشْنـا علـى طيـب الطّويّـه
نردْ الهـرج فـي وقـت المقالـي

ولانمسـي وفـي هالنّفـس كـيّـه
قبـل نكـوي بهـا راعِ الخمـالـي

نجـود ولا لنـا بالـجـود نـيّـه
نسـوق سمانهـا قبـل الهـزالـي

ولانـرجـي بـهـا رَدْ العطـيّـه
سـوى نعـمٍ كريميـن السّبـالـي

نبـي رَدْ الثّنـا يـا أهـل الحميّـه
يدوم وغيـره مـن المالـي بالـي

وأنا ماصيـر لـو مِـتْ إحضريّـه
ولو حطّيتنـي فـي قصْـر عالـي

وأنـا لـو كـان تنشِدْنـي بنـيّـه
بهـا وشـم الـبـداوه لايـزالـي

معـي ذكـرى البـداوه دوم حيّـه
تجدّدهـا علـى القلـب اللّيـالـي

وأنا لو عِشْـت بالحضـر إبدويّـه
على روس التّـلاع أَرْعَـى حلالـي