المتطفلين... وش الحل معهم؟؟

[باشة الغيد]

بسم الله الرحمن الرحيم...

وينك رايح؟؟
بكم شريت ثوبك؟؟ .. طيب كاسرت راعي المحل والا لا؟؟
كم راتبك؟؟
وش عشاكم امس؟؟
كم اقساط سيارتك؟؟ ....وغيره وغيره الكثير من الاسئله اللي يشيب منها شعر راسك..

هؤلاء هم المتطفلين-كثيرين الاسئله- للاسف يتواجدون بيننا بشكل كبير وفي كل مكان نلقاهم ,,يتدخلون فيما لايعنيهم وكأنهم نسوا قول الرسول عليه الصلاة والسلام(من حسن اسلام المرء تركه مالا يعنيه)

كثير منكم مر عليه واحد من هالمتطفلين ونشب بحلقه بكثرة اسئلته اللي ترفع الضغط , والمشكله انهم يسألون عن اشياء تافهه وماتفيدهم بشي ..

ياترى هل مايعانون منه نصنفه على انه مرض نفسي والا ايش بالضبط؟؟؟

اذكر اني قرات موضوع كان يتكلم عن هالفئه من الناس وكيف نتعامل معهم فاذكر ان الكاتب قال: نستخدم معهم اسلوب التطفيش (يعني طفشوهم باجاباتكم) فكان يقول لو سالك احد منهم : كم راتبك؟؟
قوله :بخير ونعمه,, والاكيد انه بيعيد السؤال مره ثانيه -لانه ماحصل اجابه- فبيسألك: كم راتبك؟؟
قوله مره ثانيه: بخير ونعمه,, ولو راجع وسأل مره ثالثه( ولو الاخ مافيه رجاء) مالك الا انك تروح وتتركه...

الاسلوب هذا لو استخدمناه معهم ممكن ينفع مع بعضهم ويكسر شوكته (على الاقل بيطيح وجهه شوي ويتوب ماعاد يسأل في اللي مايخصه) ,, لكن البلاء في اللي ماينفع معه هذا كله .. وش السواة معه؟؟

اعرف كثير كانوا يقولون انهم يكذبون لو يسالهم واحد عن شي مايخصه,, اما يكون القصد من وراء هالكذب كسر شوكة السائل , او اجتنابا للحسد على قولت بعضهم..

بالنسبه لكم انتم وشلون تتصرفون مع واحد متطفل ,, هل تلجأون للكذب عشان واحد مايستاهل ؟؟
او تستخدمون اسلوب (طفشني وراح)؟؟ او انكم ترفعون الراية البيضاء وتجاوبون على الكم الهائل من الاسئله؟؟

تحياااااتي للجميع..

[™ عبد الله ™]

السلام عليكم

موضوع شيـّـق ويحكي مشكله واقعيـّـه يعاني منها الكثير من الناس(المتطفل عليهم)

بصراحه انا اعتقد ان هالنوعيه من البشر ما ينفع فيهم الا الصراحه الجارحه
لأن المجاملات ما توكـّل عيش معهم

فـ كل ما سألك سؤال قـل له ( مهوب شغلك ) والا ( ليه امر وش بغيت )

فـ نحن من يمتلك دواء هذا المصابين بهذا الداء

شكرا على الطرح الجميل والراقي

[ناصر بن فالح]

دام ذي نشدتهم اشوى..!! كم راتبك؟؟ وين فصلت ثوبك..؟؟

لكن للاسف المتطفلين اللي يسالون اساله شخصيه وهم مالهم فيها حاجه هذا التطفل ..

اما الاساله الي ذكرتي اشوى على الاقل ماتصنف من الاسأله (الغبيه) الي تنرفز

اما عن طريقه العلاج الامثل للاساله اللي ذكرتي تحط نفسك سارح

[سالم الرزقي]

الله الايهينك على الموضوع الجميل

انا من وجهه نظري ان الفئه هذي عندها مشاكل نفسيه بس باقول لكم اسلوب يتخذه واحد من
اصدقاي ضد الاسئله اللي بالعربي مالها داعي خصوصا من بعض الناس وهو كلمه (حــــــوالي) يعني مديل سيارته 2007 وواحد يسئله يقول حوالي 2000 وانا واحد استخدم الاسلوب هذا وخارجني كثير



بالنسبه لبعض الاسئله اللي ماتفيد فيها( حوالي ) انا اشوف انك توقفه عنده حده من اول مره حتى ولو زعل احسن ما يزعلك كل شوي

اخوك/ سالم الرزقي

[ابوعابد]

لا هنت على الموضع وترا هذي مشكله يعاني منها ناس كثير وانا منهم لكن مانقول الا الله يعين الناس

[مسفر بن حمران]

الله لا يهينك على الموضوع الشيق انا اقولك الحل مع المتطفل اذا قام يسال بشي ما يعنيه اتقوله لو تقوم اتصب قهوه احسن وقتها ينصدم خله بصدمته واذا ما يستحي وسأل سؤال غبي ثاني اتقوله يا رجال قل خير او اصمت واذا عاد مصخها اتقول يا زينك وانت لابخ

وسلالالالالالالالالالالامتكم

[باشة الغيد]

شكرا للجميع على المرووووور
اسعدتوني بردودكم
اخ فتى البزابيز 00 اسعدني مرورك وبوريهم شغلهم بالصراحه الجارحه على قولتك
اخوي ارسطو.. بالنسبه للعلاج اني احط نفسي سارح يا ليته ينفع معهم
وفعلا اخوي سالم بجرب طريقتك (حوالي) لعل وعسى .
ابو عابد الله يعينك ويعينا..
الاخ مسفر .. حلوه يازينك وانت لابخ هههههههه

تحيااااااااتي للجميع

[المهند]

برأيي الشخصي

الحل مع المتطفل هو عدم إعطاءه جواب يسكّت القرقعه اللي في قلبه
المفروض يكون الجواب يزيد من القرقعه ويخليه أكثر حيره

مثلا لو سألنا كم راتبك
نجيبه : شخباري الراتب ، شرهتك على اللي يدري عن راتبه إذا نزل

وإذا سألنا عن الثوب
نجيبه : هذا جايني هديه

وإذا سألنا عن الأقساط
نجيبه : شنو معنى الأقساط


يعني نتفنن في حرق أعصابه وتعذيبه