قصيدة رثاء كتبتها في رثاء عمي وكبير عائلة ال خزيم ال سعده
رحمه الله واسكنه فسيح جناته
مرحوم يا اللي عزنا طول الأيام
يا سيفنا اللي باللوازم نسله
يا اللي بنى مجد على روس الاعلام
فوق النجوم النايفات المطله
اللي عطانا صيت من بين الآنام
تبطي بنا الأعمار محد وصله
اللي ليا اشتدت لنا درع وحزام
لا من تراكى للحمل دوم شله
مرحوم يا معطي مساكين وأيتام
يا (أبوفهد) يا مصدر الخير كله
لا من عطا يعطيك من حمر الأنعام
يوم إن غيره لا عطا شخص ذلَّه
مرحوم يا اللي مجلسك طول الأعوام
مفتوح من ينصاه كنَّه محله
مرحوم يا اللي كل من جاك منضام
تفزع معه فزعة خليل لخله
أحيان رجال يساوي له أقوام
وأحيان ما يسوي ولو كان ظله
وانتا تساوي بهيبتك جيش هدام
تسقي معادينك ثمانين عله
ساطي وضاري بالمواقيف جزام
من ضيع دروبه يمينك تدله
منتب من اللي يقبل أنصاف الأحكام
الحق ترضى به وغيره تزله
والعز يبقى وأنت في قبرك عظام
مثلك بفعل الخير عامر سجله
فعايلك تبقى مع الوقت مادام
يا واحد كلن بطيبه شهد له
يا واحد يحرص على جمع الأرحام
صفحتك بيضا بيننا دوم لله
يا ليت حزني ضيق وشوية الآم
وإلا مجرد دمع لا غبت أهله
لكنها في نفسي آهات واسقام
تكسر ضلوعي بصوت محد فطن له
يارب تغفر له وتمحي له آثام
وتجعل جنان الخلد هي مسكن له
والعز يبقى وانت في قبرك عظام
الطيَّب يذكر والزمن شاهد له
وسلامتكم
رابط القصيدة والتي نشرت في جريدة الرياض قبل ايام
24-08-2007, 03:39 AM
العرض المتطور
