أحصنت نجد ((إحدى درر الشعر))

[العماني]

الشاعر الإمام تركي بن عبدالله آل سعود،قال هذه القصيدة ووجهها إلى إبن عمه مشاري بن سعود في مصر طالباً منه العودة إلى نجد أرضه وأرض أجداده فقال:-

طار الكرى من موق عيني وفرا=وفزيت من نومي طرالي طواري
وأبديت من جاش الحشا ما تدرا=وأسهرت من حولي بكثر الهذاري
خطٍ لفاني زاد قلبي بحرا=من شاكي ضيم النيا والعزاري
سر ياقلم وأكتب على ما تورا=أزكى سلامٍ لإبن عمي مشاري
شيخٍ على درب الشجاعة مضرا=من لابةٍ يوم الملاقى ضواري
ياما سهرنا حكمنا ما يطرا=واليوم دنياً ضاع فيها إفتكاري
أشكي لمن يبكي له الجود طرا=ضراب هامات العدا ما يداري
يا حيف يا خطوا الشجاع المضرا=في مصر مملوك لحمر العتاري
من الزاد غادٍ له سنام وسرا=من الذل شبعان ومن العز عاري
وش عاد لو تلبس حريرٍ يجرا=ومتوجٍ تاج الذهب بالزراري
فديناك يا إبن العم هاذي مغرا=ولا خير في دنياً توري النكاري
تسقيك حلوٍ ثم تسقيك مرا=ولذاتها بين البرايا عواري
إكفخ بجنحان السعد لاتدرا=فالعمر ما ياقاه كثر المداري
ما في يد المخلوق نفعٍ وضرا=وما قدر الباري على العبد جاري
إسلم وسلم لي على ما تورا=وإذكر لهم حالي وما كان جاري
وإن سايلوا عني فحالي تسرا=قبقب شراع العز لو كنت داري
يوم إن كلٍ من عميله تبرا=حطيت الأجرب لي عميلٍ مباري
رميت عني برقع الذل برا=ولا خير فيمن يدوس المحاري
يبقى الفخر وأنا بقبري معرا=وأفعال تركي مثل شمس النهاري
نعم الرفيق ليا سطا ثم جرا=يودع مناعير النشاما حباري
وأحصنت نجد عقب ماهي تطرا=مصيونةٍ عن حر لفح المذاري
ونزلتها غصب بخير وشرا=وجمعت شمل بالقرايا وقاري
والشرع فيها قد مشى وإستمرا=ويقرا بنا درس الضحى كل قاري
زال الهوى وألغى عنها وفرا=ويقضي بها القاضي بليا مصاري
وإن سلت عن من قال لي لا تزرا=نجدٍ غدت بابٍ بليا سواري
ومن أمن الجاني كفى ما تحرا=وتازا حريمه بالقرايا وقاري
وأجهدت في طلب العلا لين قرا=وطاب الكرى مع لابسات الخزاري
ومن غاص غباب البحر جاب درا=ويحمد مصابيح السرى كل ساري
وأنا أحمد اللي جاب لي ما تحرا=وأذهب غبار الذل عني وطاري
والعمر ما يزداد مثقال ذرا=عمر الفتى والرزق في كف باري
وصلاة ربي عد ما خط بالرا=على نبيٍ ماطاف بالبيت عاري

وسلامتكم،،،

[المستشار]

ما في يد المخلوق نفـعٍ وضـرا=وما قدر الباري على العبد جاري

مشكور اخي العماني على القصيدة الجميلة وصح لسانك ولسان الشاعر الإمام تركي بن عبدالله آل سعود .


تحياتي

[فيصل بن حجرف]

السلام عليكم

لاهنت اخوي العماني على القصيده الجميله

ودائما كما عودتنا ماتختار الا كل ماهو جميل ورائع

تحياتي لك اخي

[العماني]

حياك أخوي المستشار وصح بدنك وأسعدني ردك الطيب.

تقبل تحياتي،،

[العماني]

العجمان

حياك الله ابوعبدالله ولا هنت يالسنافي على المرور

تقبل تحياتي،،،

[ابوحمد الشامري]

بيض الله وجهك يا ابو مبارك على هذه القصيدة الجزله الغنيه عن التعريف.

وللعلم ان مشاري ابن عم الامام تركي حدث بينهم خلاف وقام مشاري بتدبير إغتيال ابن عمه الامام تركي فأمر عبد أسمه حمزه بقتل الامام تركي في صلاة الفجر وكان الامام تركي جالس في الصف الاول في المسجد يتسوك بسواك وبجانبه ابن عمه مشاري وكان خلفهم العبد حمزه فعندما رأى الامام تركي ابن عمه مشاري ليس معه سواك قطع سواكه وأعطاه ابن عمه مشاري لكي يتسوك فيه فكان له الاثر الكبير في نفس مشاري وعندها قام مشاري وامر العبد بعدم قتل الامام تركي فقال العبد حمزه فرد حمزه ثاير ثاير وعندها قتل الامام تركي وحكم مشاري الرياض وعندما علم الامام فيصل بن تركي بمقتل ابيه وهو في الاحساء في مهمه رجع الى الرياض وحارب مشاري وقتله واسترجع حكم الرياض.

تحياتي لك يا ابو مبارك

[مـحمـد]

الله لايهينك على القصيده اللتي هي في الحقيقه درر من اجمل القصائد العربيه

واشكرك ابو حمد على التوضيح

[العماني]

ابو حمد الشامري

ووجهك ابيض وما قصرت يالسنافي على التوضيح والتعليق والله لا يهينك

تقبل تحياتي،،،

[العماني]

ALAJMI

حياك الله ولا هنت على المرور

تقبل تحياتي،،

[أبو الوليد]

اخوي العماني لاهنت
وصح لسانك ولسان راعي الاجرب عليه رحمة الله

تحياتي لك