غيبوبة الوطن : منفى صاحي

[العـتيبي]

تعبنا نكنس الخطوة عن الدرب : الشحيح الجاف
ولا تتنفس الغبرة ، سوى بصمات رجلينا !

يبسنا نلهث لمنفى ، طريق ٍ والغياب : أضعاف
ولا نقطف من الغربة ، سوى تلويحة أيدينا !

قدعنا هالوطن : جوع ٍ ، تقهويناه : سم زعاف
مدامه حزننا أرحب صدري من أطراف البكاء فينا

توهقنا بـ زراعة قمح ، زرعنا والسنين عجاف
وصرنا سنبلة جوفاء ، وعيّا المـاطر يجينا

أنادي : سنبلة روحي ، ترى ماعاش هاللي يخاف
أحاول طبطبة خوفك ، وأنا : الميت على هوينا

حلمت بحقلنا أخضر ، حلمتْ ومرقَدي شفاف
ألوّن واقــع ٍ أغبـر ، و عجّ الحـقل يعمينا

أنا عصفورتي : تايه ، وأنا اللي ما عليّ خلاف
وخانت هقوتي فيني ! .. دخـيلك لا تلــومينا

يبات الحلم في صدري ، بلا خبز وبليا لحاف
يموت أطفال في دمـي ، وهذا الحـلم يبكينا

اخـبّي الحلم بإيديني ، أربي بالسنين أطياف
أهدهد حلمي بصدري ، وصحّاْ الحزن طارينا

تكسّر حلمي بصدري ، وطى قلبي عليه وخاف
ألا يا حـظي الأقشــر .. متى بزعمك تهنينا؟!

غدينا كننا حلم ٍ ، فـ بحر ٍ راهي الأطراف
لحب ٍ أجهضه حتفه ، ومـــات ومالقى مينا !

[فلاح بن ملبز]

صح لسانك يا العتيبي


ولاهنت