( مســاحـــه لسفّك دمـــاء الشّعـر )

[نايل الظفيري]

يتوه الكلام و ما لقى ياعـرب مطّـلاع
وأنا كل ليله أحتـري لحظـة إطلوعـه

كأنه حبيس بداخلـي سجنـه الأضـلاع
وكأن المشاعر والأحاسيـس ممنوعـه

وأنا الشاعر اللي إعتنق قمّـة الإبـداع
وغيري يكافح لجّل يبـدع بموضوعـه

تعلمّت كيف أكتب قصيدي من الأوجـاع
و أيقنت بإن اللي مضى يصعب إرجوعه

على مركب الأيام مبّحر بـدون شـراع
وليالي الحزن راياتها السـود مرفوعـه

تولتني الدنيا وأنـا مـن يـرد الصـاع
على المعتدي صاعين وبالكاش مدفوعه

وغيث الفرح يقتل جفاف الشقـا بالقـاع
لو الأرض من وسم الفرح شبه مقطوعه

أنا أتصنّع الضحكه وأنا خايف ومرتـاع
أسولف وأجامل بإبتسامـات مصنوعـه

لعلّ وعسى في يوم تتّحسـن الأوضـاع
وترتاح نفسي من عنى الوقت والروعه

شريتـه ولكنّـه طلـع بالغـلا بـيّـاع
وأنا كنت أظن الحب بـذره ومزروعـه

لك الله يا مجمول يابـو عيـون وسـاع
ترفّق مدام إن الحشا أعلـن إخضوعـه

أنا إن قلت لك أيّوه قلبي عليـك إلتـاع
تأكّد بـإن القلـب قـد صابتـه لوعـه

[نايل الظفيري]

سلامي سلام الله عدد ما لمحّنا ضيّ
وتعداد ماهلّت سحب وابل أمّطاره

على اللي ذبحّني بالهوى والغلا ياخيّ
وهو خابر إن القلب داره ومقداره

أنا لاذكرته عفت زادي وعفت الميّ
سرقني سرق قلبي وعقلي من افكاره

أحبّه محبّة شمّر لحاتم إبن الطيّ
وأحبّه محبّة طير بعيون صقّاره

طبع حبه بقلبي كما الوسم عقب الكيّ
ولو دارت الأيام ماتمحي اثاره

عقب غيبته مانيب ميّت ولاني حيّ
فديت الكويت وكل من يسكن الحاره

لعلّ المشاعر يحتويها بهواهم فيّ
وتضحك لي الدنيا وتصفالي أقماره

وأنا لي متى يهل الهوى إتقودني رجليّ
ولاكنّ هاذي هي إدروبه ومشواره

[نايل الظفيري]

لو كان بوحي مثابة رحلتي والعبور
الليل مرسى مراكب حزني العابره


شاعر وأسيّل حروفي من سحابة شعور
يوم إنّ غيري قصيده كاسره جابره


أحلامي أموات لكن الليالي قبور
عاش بكنفها طموحي وإنقطع دابره


كنّ الأماني بعيني مثل روضٍ قفور
إجتاحه اليآس في سيله وبمثابره


العمر تأبى رحاته لا تلف وتدور
والنفس ملّت من الضيقه وهي صابره


من غيبتك والدقايق في مقام الشهور
من غيبتك والليالي كلّها غابره


وين إنت يلي غيابك يحتريه الحضور
ما عاد باقي لك الله جرح وآكابره


تعال وأشعل ظلامي من جبينك بنور
أبيك ترجع هذاك اللي أنا خابره

[نايل الظفيري]

وين إنت..! شفني تعبت أصارع أمواجك
غزير بحّرك وأخاف إنه يغرقّني

تعال وأضوْ الشموع بطلّة سراجك
الشوق من غيبتك ماهو بـ/يعتقنّي

لبى عيونك ولبى ضحكة حجاجك
طيفك وأنا في لذيذ النوم يسرقني

الجرح ما يلتئم إلا من علاجك
والليل لا من ذكرتك دوم يرّهقني

معذور قلبي لو إنه سبب إزعاجك
البعد نار وغيابك حيل محرقّني

والله لو إنك دريت شكثر محتاجك
ما كنت يا صاحبي لحظه تفارقني ..!

[نايل الظفيري]

جيت من كثر الوله والـوّد سـاري
والغلا ليـل وعلـى شانـه سريتـه

جيت أطفّي من لهيب الشوق نـاري
جيـت لكـنّ ياخسـاره مالقيـتـه

أستر همومي ووجه الحزن عـاري
بـان بعيونـي لـو انـي ماحكيتـه

الهوى ماهـوب كيفـي واختيـاري
الهوى لو هـو بكيفـي مـا هويتـه

كل ماجابوا عليـه النـاس طـاري
رحت أسلي خاطـري قـدام بيتـه


من غياب الغيث وش ذنب الصحاري
في ضماها من غياب الغيـث ميتـه

طالـت الغيبـه ومليّـت انتظـاري
والصبر من طـول بعـده ماقويتـه

ليتني ماكنـت بالوصـل انتحـاري
بعت عمري وأحسب اني اشتريتـه

جيت أدور فـي خبايـاه اعتبـاري
جيـت لكـن ياخسـاره مـا لقيتـه

[نايل الظفيري]

راح أكثر العمر واللـي مـن سنينـه بقـى
ذكـرى وحـبٍ قديـم استأصلته السنين

أشوفني فـي عيـون النـاس مثـل النقـى
وأحيان أكون بعيـون النـاس سـرٍ دفيـن

من كثر ما شفت في وقتـي همـوم وشقـى
كن ّالحزن من ورى الحدب الرهايف سجين

الحب غصن ٍ لـو إنـه بالوصـال إنسقـى
يبات مثّمر غـلا فـي نظـرة العاشقيـن

يا غايبه كـان مـا جابـك حنيـن اللقـى
ما عاد أبي منك فزعه و إرجعـي لا تجيـن

أنا وجرح المفـارق مـن زمـان أصدقـى
وإنتي مثل ما خبرتـك قاسيـه مـا تليـن

الشعـر طيـرٍ بصـدري للمعالـي رقـى
في هدّته مـا يجيـب إلا الكـلام الثميـن

يا منهكة شاعـرك معـذور يـوم إن هقـى
إنك رغم كـل هـذا البعـد لـه ترجعيـن

تدرين ؟ من عمره اللي ضاع وشهـو بقـى
قصايـد ٍ فيـك ( يكتبهـا) لهـا معجبـيـن

[نايل الظفيري]

لو الحكي يبني القيمه على سكوته ..
إخترت بوح المشاعر سلمي وشرعي

الشعر لو كان ماتنصفني بيوته ..
ما عاد أعدّه بحسبة سيفي ودرعي

شاعر وأترجم أحاسيسي على نوته ..
أعزف بها خاطري وأطرب لها سمعي

حيل إمتضايق وأحس الروح مكبوته ..
ما كنّ هذا الفرح فيما مضى طبعي

الجرح جايع ولكن الحشا قوته ..
الحزن غصني ولكنّ الشقا جذعي

الشوق ميّت ضمى والقلب تابوته ..
والصدر مجلس عزاء ومدخله ضلعي

ما كني إلا سقيمن يحتري موته ..
من يوم ليل الغلا ما قد طفى شمعي

والصاحب اللي عساني فدوه لصوته ..
اللي عشانه حجر عيني عتق دمعي

هو ضيّ عمري ولولوّه ويا قوته ..
لوني تبعّثرت من غيره يبي جمعي

لو الأوادم بدنيا الحب مبخوته ..
ماهيب ذي حالتي ولا هو كذا وضعي

كل الأماني غدت باليآس منحوته ..
مات الأمل يوم ما يآسي قدر قمّعي



وسلامتكم......

[نايل الظفيري]

زرعت من بذرة الأحساس فيني شعور
لين أعشب وحينها قطفت عذق الكلام


أبكتب اللي أحسه في خفوقي يثور
يمكن تهون المواجع والحمول الجسام


يا كثر ما شفت من وقت الغرابيل جور
عرضت نفسي على شانك لكثر الملام


الصدر (غصن ٍ ) تغني لك عليه الطيور
تعال وأسمع عليك شقال صوت الحمام


محتاج لك مثل ما تحتاج هاالارض نور
محتاج ( أحسّك ) معي لإني أعيش بظلام


أبيك لو هي على قربك تضيق الصدور
يا أول اللي ( معه ) عرفت معنى الغرام


علمتني الصبر لو ماني حليم وصبور
وعلمتني ( التضّحيه ) لو ما أطيق الخصام


لو هو صحيح ( بملذاته ) يفوز الجسور
ما كنت أخسرّك وأنا ما ذقت طعم إنهزام


ما أشوف (غيرك ) لو الدنيا متاع وغرور
يا كثر من مرّ بعيوني مرور الكرام


يقتلني اليآس وأحلام المواصل تبور
بس الأمل ينثر بصحّراي مزن الغمام


يا غايب اليوم من (فعل) أمس منت معذور
يوم إن طيفك سرقني من عيون المنام


كم لي وأنا أكتبك من إحساس صادق شعور
بيت ٍ بنيته ولا جابك عسى للهدام

[نايل الظفيري]

البارحه يوم طيفك مرّ قدامــي
أتعبني الحزن في نبّرة مزاميره

هزّيت جذع الكلام وحرّك أقلامي
الشوق يوم ان هبوبه جتني مغيره

والله لو منت غيمه بلّت إلهامــي
كان أجّدب الشعر ماتثمر تعابيره

أغليك من هامتي لين أسفل اقدامي
يلي عليك أشتعل واطفي من الغيره

أشربك لين أرتوي واحسني ضامي
لو أشـبعك كن جوعـي زاد تأثيره

حـبـك بقلبي كآنه بـصمة إبهامــي
يعني مع الوقت يصعب حيل تغييره

لانك من أحلام عمري صفوة أحلامي
ولانك من الناس شخص ٍ ما أبي غيره

يابلسم الجرح والا جرحي الدامــي
القلب بيت ِ جفوه أغلى مساييره

محتاج أحسك معي لو ضاقت أيامي
مثل إحتياج الغريب اللي ترك ديره

من كثر ما كنت أصدق كذبة أوهامي
كنت أحسب إن كل تآخيره تجي خيره

يـامتلف الحـال زادت منّـك آلامــي
عذرك غيابك .. ! ولكن ايش تبريره

كآنك على البعد مستعجل فإعدامي
ميّت لي أعوام من وقتي وتقصيره

[نايل الظفيري]

بنزف أمل لو كان يطعنّي اليآس
دام الرجا ما مات في مهّجتي حيّ



ما جيت خالي جيت أكتبّني إحساس
عبرت به آخر مسافه من الغيّ



مثلي إذا ما حط له بالشعر ساس
يا علّها ما تكتب حروفه إيديّ



حلّقت لو مالي جناحين قرناس
يعني من اللاشئ أوجدت لي شيّ



يمكن أكون ( إنسان عادي ) من الناس
بس الأكيد إني ترى ماني شويّ



يقتادني حلمٍ غشا جفّنه إنعاس
على الطريق الموحش اللي بلا ضيّ



أحس بي ضيقه ومحبوس الأنفاس
ما كنّ فرحي يشتهي لذّة الفيّ



أحيان تكتبني همومي بقرطاس
وأحيان اطويها كذا بالصدر طيّ



تهزمني الأيام لوني قوي بآس
تعبت أسايرها بخطوات رجليّ



الشوق غصن ولكن عروقه إيباس
والقلب ضامي وإنت بيدينك الميّ



يلي شبيه الورد لو هبّ نسناس
البعد جمره تكوي مواصلك كيّ



كنت ف/ عيوني غير عن باقي الناس
واليوم شفتك في عيوني ولا شيّ