شيلة قصر دخفــه للشاعر الكبير :سالم بن محمد اليامي . ارهابي الساحه .

[محمد بن مهدي العرجاني]

بسم الله الرحمن الرحيم

السلام عليكم ورحمة الله وبركاته

شيلة قصر دخفه للشاعر الكبير سالم بن محمد اليامي .ارهابي الساحــه.

ــــــــــــــــــــــــــــــــــــــــــــــــــ ــــــــــــــــــــــــ
ياقصر دخفه لا يجي خاطرك شين
والوعد أنا ويّاك عيد الضحيّه
ياقصرنا قصر الشيوخ السلاطين
أهل الوفا والطيب وأهل الحميّه
ياقصر أبوي اللي بكوه الوفيين
وناحت على فرقاه كل بدويّه
ياقصر دخفه ياوكور الشياهين
ماتنطفي ضوّك وذا العين حيّه
ياقصر عندي لك عذر واسمعه زين
اسمع ولو ماللعذر قابليّه
عذرٍ يرج القلب قبل الشرايين
وعذري ورب البيت ماهو شويّه
تدري وش اللي مبطيٍ باحمر العين
اني اجيك وراحتيني خليّه
عذري لفاك ودوّن العذر تدوين
وخل المغني يضبط الشاذليّه
ليت الوليد يدفني بالملايين
ولا يخليني بقامة خويّه
ولا ينغنغني بشاصٍ ورنجين
ولا بقصرٍ من سموّه هديّه
ولا ترى بشكيه لكن على مين؟
مالي ومال أهل الخطوط القويّه
وازرعك يادخفه نخيل وبساتين
واجعلك دُره في عيون البريّه
البارحه غنيت والناس ممسين
ضايق وفيني ضيقةٍ عالميّه
ماهي بضيقه من هلات الفساتين
الا من حظوظ الزمان الرديّه
كبدي تُغش وداخل الكبد نارين
وكاتم لهبها بالظلوع الأبيّه
لكن جوالي يعيد الموازين
ويبدل اوضاع العيون الشقيّه
لادقت الى كل عمري لها دين
فديتها في كل صبح وعشيّه
وفديتها بالطول والعرض أمين
ويالله عساني فدوة الحُفليّه
ست الحبايب ساحرتني بسحرين
أمي حبيبة قلبي الأوليّه
لارن جوالي وقالت هلاوين
قلت أرحبي ثم أرحبي يااسعديّه
تبغى تصبحني بصبح البداوين
صبح القلوب الواصلات الوفيّه
وأبسط معاها لين أفل الحجاجين
وفي صوتها الرنان لي جاذبيّه
وانسى العذاب وحزة الهم والشين
وتنشط خلايا المخ بالشاعريّه
واجيب مايطرب عقول الفطينين
ومايكسر أهل الجهل والجاهليّه
ومايثبت أن الراي ماهو برايين
ومايُسقط أهل الزور والعنجهيّه
وقلبي كذا واحد ولاهو بقلبين
وفطرة شعر يأهل العقول الغبيّه
ولا أعرف التنقيح ولا التلاحيين
ومستفعلان وطقة الفاعليّه
ومن غير لا ضمه وشده وتنوين
والعجز بعد الصدر تسمع دويّه
وذا مدحت امدح من الناس غالين
غالين ولهم داخلي مقدريّه
احب أنا شمر كعام المعادين
والنعم للعتبان لين الحويّه
ومطير عندي داخل العين عالين
ويشوش راسي لعتزت وايليّه
واحب حرب اللي على الحرب ضارين
سقم الحريب اللي نواهم بسيّه
ولنا مع السبعان جدٍ وجدين
لاعودت بين العرب طايفيّه
ولا عاش من لا يحتمي في القحاطين
ذولا محلفنا لا غدت عنصريّه
وذا اعتزي عند الدواسر وراعين
ماكني الا عزوة الدوسريه
وكل القبايل نعم فيهم ونعمين
لو كان ماجبت الاصول البقيّه
وانا من اللي في المجالس سلاطين
صبيان يام ان صار بالوقت هيّه
على الخيول تقول مثل الشياطين
تقبل بني عمي سريّه سريّه
لما أقبلت غيثٍ سقى كبد ضامين
وطب الخرام وروسها ضيغميّه
وان دبرت كنها زعوط المجانين
منيةٍ تملا حياض المنيّه
صبيان يام اللي تُقص الميادين
أهل السيوف الحُدب والصيرميّه
اني ولد سعد على العسر واللين
تباشروبي يامشايخ ارضيّه
ياقصر دخفه وين وديتني وين
وقف وسجل كلمتينٍ وصيّه
لو عشت بالدمام عامٍ وعامين
والله ماينسى الخوي عن خويّه






اليكم القصيده با الصوت


http://www.youtube.com/watch?v=P_aj3...layer_embedded

[ميـــاسه]

ابيات في قمة الروووعه

تسلم يمينك


ولاهنت

[العز بالسيف]

عرجاني الخرج
وعليكم السلام ورحمة الله وبركاته
أرحب
صح الله لســــانك ولسان الشـــاعر سالم اليـــامي
مشكور على الموضوع المميـــّـــز , لاهنت
تحياتي

[ناصر ال صليع]

لاهنت على النقل

[محمد بن مهدي العرجاني]

مرحبا والله ومسهلا ولاهنتووو جميع على المرور