المرعب ورحلة خيل ,ولهجة خير, ومهجة تطمح للاكتمال
الحيا من اللي خلق هالعالم ومغنيها=السما هذا سماه... القاع هذا قاعه
وجعل نفسٍ تستمر في معصية باريها=تبطي وهي بين ضلعين الحنك نزاعه
لاجفتك الديره وضاقت بك وباهليها=وجاك من جيش الهموم اثعالته واسباعه
وفسقت العالم . . وناقم خبلها صاحيها=وحكيت الرٌويبضه . . وانبطروا الزٌرٌاعه
غط خشمك في التراب وقول : يا مفنيها=افنني وانا مسبحٍ لك بسمع وطاعه
راكب اللي ضمٌر من اسهابها جنبيها=أولف من الجد . . ومن ظلالها جزاعه
لا اوقفت رزت قواصيها على دانيها=ولا مشت يطري عليك الهوش والفراعه
لو مقدمها "صباح الخير" يا راعيها=ولون موخرها مثل ماتشعل الولاعه
في نحرها المجد والخير الرضي قافيها=وفي وسطها غاروا الشيخان والفزاعه
ايعقب سوامها قبل يخسي شاريها=ماتجمع عندها الدلال والبيٌاعه
من مرابط عز وراعيها ماهوب مصخيها=مايودعها المودع عند اخوه اوداعه
امخشوشه لين ياتي في السٌبق طاريها=ولا اظهرت لفٌت رقاب العالم الطماعه
كنها في موكب (السواس) وامباريها=بنت اميرٍ من كثر طيبه تحشم اتباعه
وكن الارض تقول فيها:يالله انك تحييها=جعله ابرك يوم جيتي فيه وابرك ساعه
ولا ابتدا المركاض وجتك الخيل من تاليها=جاتك اوٌلها . . تقل في ذيلها (درٌاعه)
ضرب يديها على البيدا قبل رجليها=ضرب اصابع فارعٍ تطبع على طباعه
تنحر الي يعرف القصه قبل لا احكيها= بس . . ابحكيها عليه وبارفع السماعه
الرجال اشكال وعاليها على واطيها=فيهم الادنى. . والادنى . .والدني بأنواعه
وفيهم اللي لا بغى له حاجه يسويها=مايرده عقل ولا تحتميه اطباعه
وفيهم اللي لا رمى الطولات مايخطيها=كل ماهبت هبوب الطيب فل اشراعه
وفيهم اللي ياخذ الحسنه ولا يجزيها=وهذا ابشع شئ . . واردى نوع . . واكبر راعه
وفيهم اللي جاته الدنيا وهو هاويها=حظه ايكسٌب له اللي ماكسبه اذراعه
وفيهم اللي علته في جوشنه كانيها=ماتسولفها زوايا خافقه لأضلاعه
وفيهم اللي شل هم الناس ومحاتيها=وما فلح في اوضاعهم . . ولا التفت لاوضاعه
وفيهم اللي لا حكى كلمه مهوب يثنيها=وفيهم الزيزوم . . ووجه الخير. . والطرقاعه
والحياه . . اشياء تتراكم على بعضيها=مايفرٌق بعضها الا من يحسب اوجاعه
والله اني صرت لا ابغضها ولا ادانيها=معتبر نفسي متاجر والصلاة بضاعه
لان قلبي من عرف وش في الصلاة وفيها=غاديٍ كنٌه وهي..(البزر) و (المرضاعه)..!
ووالله يارجل يجنبها ولا يديها =إن ماله خانه . . ومافي عمره اطماعه
وانت لو زليت عندي زلتك ناسيها=وجعل كبد اللي مهوب يغليك سم اللاعه
صاحبي ماتعرف الانفس ولا خافيها=النفوس من النفوس الخافيه . . ملتاعه
صاحبي مرٌ الليالي من سبب حاليها=صاحبي انزع من القلب النبيل قناعه
ما انت (مكوش) على الدنيا ولا محصيها=انشد اللي لاعب الدنيا براس اصباعه
سته وعشرين عام افلها واطويها=صبحها رغٌابه وفي ليلها منٌاعه
صاحبي جنب حراميها قبل حاميها=صاحبي . . صاحبك من صدقه يهل ادماعه
بانصحك نصيحةٍ ماعادي بثانيها:=دام عمرك ساعه . . اجعلها لربي طاعه
اعذروني على الاخطاء ان وجدت
13-11-2005, 04:06 PM
العرض العادي
