بسم الله الرحمن الرحيم
اولا احب ان اهنئكم بهذا المنتدى المتميز وانشالله الى المزيد
من التقدم والتميز
وكل الشكر لمن دعاني
اليكم ..........
البارحه نويت ارقّم وابتدي بأغرامي
= وحطيتكم في وسط راسي يا ( سلالة حوّه )
جبت لي قطعة ورق كتبت فيها أرقامي
= بخطي اللي من عرفته مايجي الا مشوّه
لبست ( ثوب العيد ) ورحت مظبط ٍ هندامي
= وركبت في سيارتي اللي مبهذله من جوّه
وصلت للسوق ووقفت بموقفي القدامي
= ونزلت كنّي تقول أنا و ( بوش الصغيّر ) خوّه
دخلت وشفت آوادم ٍ بمختلف الأحجامي
= وهمي اشلون ابتدي ؟؟ وأنا ماعندي اجروّه
رزيت وجهي انتظر حتى اورمت أقدامي
= وأقول : وش في السوق هادي الصمت يملى جوّه ؟؟!!
أثر العرب ( بلوتوثيا" ) ترسل الارقامي
= وأنا على الدقه القديمه بالرقم اتفوّه
( اي ماعلينا المهم ) : شوي وجت قدامي
= ذيك ( الهنوف ) اللي نهدها يالله طالع توّه
في ذمتي مابه شبهها يالجمال الشامي
= وأنا مسوي : اني( ثقيل) مسوي فيها ( افتوّه )
لها عيون ٍ كنّها تقول : ( عشقي الزامي )
= وكنها تقول لخافقي : ( بتحبني بالقوه !! )
لدت نظرها صوبي وتراجفت بي اعظامي
= ومن كثر ماصب العرق تقول : ( فوقي نوّه )
قلبي يقول : أبدا الكلام الحين حامي حامي
= وعقلي يقول : أحذّرك واللي براسك سوّه
وطعت ( قلبي) وقلت : ياخي ديننا الاسلامي
= حرّم علينا قتل نفس بدون حق ( اعنوّه )
وأنتي ( عيونك فاتنه ) أنا لي ( قلب ٍ ظامي)
= ( تكفى ) وأنا لاقلت : ( تكفى ) خلّ فيك ( امروّه )
من شفتك وقلبي شلع صدري وفك أزمامي
= ويقول : عادي بوصله لوّه ذبحني ولوّه
ويقول : هو اللي ضامني وأنا مانيب أنضامي
= وأقول : هذا هو( ياقلبي)؟؟ قال : ايوه هوّه
لدت وقالت : أنت شكلك من كلامك ( يامي ) ؟؟
= قلت : وأنا من لابة ٍ أمزبنة لجلوّه
قالت : هماك الشاعر اللي ذوّب الاقلامي ؟؟
=قلت : وأنا اللي لاتكلم قالوا : عنه ( امفوّه )
قالت : وأنت اللي لذكره دنّقت الأهرامي ؟؟
=قلت : وآنا الأجودي اللي ماتطفّى ضوّه
قالت : وأنت اللي عن الهفوات دايم سامي ؟؟
=قلت : وأنا اللي كل هم الناس لحق ( اعلوّه )
قالت : وأنت النادر اللي أرقبه من عامي ؟؟
=قلت : ( الذهب ) يافاتنه ندرته سب ( أغلوّه )
قالت : وأنت اللي لعينه نُكّست الأعلامي ؟؟
=قلت : وأنا اللي ماورث من جدّه الا ( احموّه )
قالت : وأنت اللي بجوفك نام جرح ٍ دامي ؟؟
=قلت : وأنا اللي صار فرحه داخله يا شوّه
قالت : وانت اللي طعونه شيى معه أرغامي ؟؟
=قلت : وأنا اللي صار حزنه من وراه وتوّه
قالت : وأسمك ( علي ) ؟؟ قلت : وأدلع ( رامي )
= أضحكت وهي تقول : حليله اللي يموّه
طيب مدامك تعرفيني وتعرفين ( آلامي )
= مافيه داعي يابعد عمر القصيد أنوّه
قالت : فديتك يا (علي ) أنتا ( فتى احلامي )
=قلت : وفديتك والله أنّك حلمي اللي ايتوّه
وأنا اتكلم عن ردى حظي وشقاة أعوامي
= وبينما أزداد الحماس وهو بقى بهدوّه
فجأه ولين أمي تصحيني من أحلى أحلامي
= تقول : قم وأسرح لشغلك قم ترانا اضحوّه
واقوم وأنا ألعن الحظ الردي وأيامي
= واقول : يالله لاتخليني فريسة ( حوّه )
,
,
,
وسلامتكم
اخوكم / علي الشهي
22-03-2006, 03:00 AM
العرض العادي
