السلام عليكم ورحمة الله وبركاته
هذي قصيده لشاعر خالد بن مدعث الوسري اعجبتني وحبيت انقلها لكم وإن شاء الله انها راح اتحوز على رضاكم ..
البارحه جفن العانى عناني=من هاجس عن مرقدي قزاني
قامن روابع خاطري يردنه=وردًا مثل ورد القطا العطشاني
على محير ٍ صافيِ ٍ في صفصف=مايرده إلا مومي الجنحاني
وردنه بيوم ٍ هبوبه لاهب=وهيفية الكنه لها دخاني
والما موارده بعيدٍ عنه=وقبل امس ما شربًا شراب ٍهاني
طار ٍ يذكرني بعصر ٍ فايت=عصر ٍ مضى في سالف الازماني
ما بقى إلا ذكر أهله مخلد=ناس ٍ فنوا واللي سواء الله فاني
مطوعين الكايد المستعصي=تحت يديهم كل صعب ٍ لاني
ما يشترون إلا الثمين النادر=جواهر ٍ يرجح لها الميزاني
ولا يقطفون إلا القطوف المثمر =وقطف الثمر ما هو بخط اغصاني
ولا يبدعون إلا البيوت الشرد=إلي مقاطعهم مثل شاماني
جزل القصيد إلي يصحي النايم=مثايل ٍ يبصر بها العمياني
مثل السدير والدجيمى ومرشد=وابن حميد ومحسن الهزاني
وشالح وابن لعبون وابن ادويرج=وخلف الاذن وبديوي الوقداني
والقاضي ودعسان وابن سبيل=ومشعان بن هذال والدنداني
وعساف وشليويح وابن طويرش=وسعدون والظلماوي وراكاني
والغيهباني والخلاوي وراشد=وابن شريم ومحدي الهبداني
لو با تقصوى ما قدرت احصيهم=واللي ذكرت اثباتي وبرهاني
قبل الاذاعه والقلم وصفحه=تلقى قصايدهم مع الركباني
واليوم جيل الفاهم المتثقف=جيل ٍ نهج بالشعر نهج ٍ ثاني
متخالط شعر النبط بالفصحه=ويالاح وياملاحي ويا ليحاني
واخر مديلات القصيد الدارج=قصايد المتولع الهيماني
يبدا القصيد وينتهي في نفسه=انا تراني فلان وابن فلاني
غاز ٍ معا مهنا بسيف ومنسف=وإليا تعزوا جندل الفرساني
يفتل على البنت الضعيف الشارب=ويقول احب سخيف الذرعاني
ما يدري ان إلي يحب يضحي=العمر ما يغلا على الخلاني
وهذا حلال القوم ربعه واجد=الله يعافيهم ولا يبلاني
وقصادهم في مجتمعهم كنه=اعمى يوصفله على صقهاني
ويصرحون ان الشعر مدهور=ودواه قطع القلب والشرياني
والي يسوي مثلهم مايبلش=مشرعه في وجهه البيباني
في مدرسة حوس القصيد يدرس=ويعطى جميع ادروسها مجاني
حاس القصيد وجاك محد ٍ قده=شاعر ونجم ومبدع ٍ فناني
وغارت مع الخيل المغيره شقرا=في كل ميدان لها ميداني
هذا يسمى عابث ٍ مجري= ولا يسمى ملهي الرعياني
وشعر الحداثه ما يقوله شاعر= لو جيت اقوله مايطيع اللساني
حومت خيال ٍ حومته لا عادت=حول بصيدة طير ابن برماني
صور لهم من فوق فلم ٍ مختل=خالي من الاشكال واللواني
مثل السنابل بالدفاتر تزرع= والشمس تحكي قصة الحرماني
ولون السما صفرا وبني فاتح=والأرض تمطر والسحاب يعاني
هذا يبروز صورة ٍ محترقه=سلعة فقر من خزنة الفقراني
وهذا كلامي واضح ومثبت= والشعر دوله ما لها سلطاني
وانا على رايي وكل ٍ ورايه=ويسلم على قول الصحيح اللساني
ولكم كل الشكر والتقدير
23-04-2007, 02:30 AM
العرض المتطور
