ملحمة ألأبل

[ابو سعد]

السلام عليكم ورحمة الله وبركاته
هنا قصيدة الشاعر علي بن بلال اليامي المشهوره بأسم ملحمة ألأبل
وأتمنا أن تعجب القراء

الحمد للمعبود رب العالمين = ذا الكون والآيات عنّا يا معين
إيّاك نعبد يا إله ونستعين = فوق الذلول اللي نمِس ابطانها
والشعر مع سفن الصحاري له مدار = أحلّ وأفضل ما مشى فوق الديار
وأغلى وأجمل ما خلقه الله جهار = البِلْ عطايا الله هذا عنوانها
إذ قال فيها كيف خُلقت بالكتاب = يصعب علي التعبير والشعر والجواب
إلا أنها عبرة ومنشاها السحاب = مال وجمال وعظّم الله شانها
غاثت نبي الله صالح وأمّته = وليا أقبلت للبير شربت جمّته
لين عقَروها القوم والله نقمته = حاطت علي اللي سببوا فقدانها
والإبل قبل آدم وحوّا يخلقون = خلقت من أول ما خلق منشي المزون
موجودةٍ لين الأودام وينتهون = جعله فداها من جَحد عرفانها
هذي حلايب لـ.. أنبيا والمرسلين = وهي الركايب للأشدّة والضعين
وهي الجلايب عند فرغات اليدين = وهي الوقار ليا أقبلوا ضيفانه
وهي الهدايا اللي تسكت كل فم = وهي الكبارة للزعيم اليا زعم
لعل دارٍ ما لها فيها قسم = مع الزلازل تنفجر بركانها
وهي الكسايب ل.. التقوا قوم وقوم = أحد تصير أبعد عليه من النجوم
واحد كسبها غصب من فوق الخشوم = ليا رقص للمعركة شيطانها
ياما وياما من هجاد ومن صباح = للخيل والفريس حمران الرماح
وقومٍ حموها ف.. المفالي والمراح = وقوم تضويها بضرب ايمانها
لولا غلاها ما سرح فيها ذياب = فوق الأصيل اللي كما فرخ العقاب
ينوب عن تسعين فارس بالحساب = اليا قضب سرج الفرس وعنانها
وصّاه ابن سرحان فيها ثم قال = أوصيك فـالبل ذخرنا في كل حال
من لاحماها ما تصب له الدلال = ذي ساعة الخلاّن في خلانها
مشروبنا والقوت در حجورها = وعند الرحيل تشلينا بظهورها
ويكسي وبرها عند عسورها = ومن جلدها مصنوعةٍ حيضانها
وكرّر يقول اخفافها فوق الحفا = يوصف سماريها على وصف الصفا
تدبير من في خلقه الكون اكتفا = تاطا سماريها وهي حذيانها
قال ابن غانم لا توصيني حريص = ليا غدى السيف والحربة وريص
أخلى الفريس بدماها ربيص = لا بارزتني واشهرت عيدانها
كلّه عن البل والجديد من القديم = لو أتجول من عديم إلى عديم
ما أكملت ذكر اللي يردون الوسيم = والبل وأهلها تنعرف وأزمانها
ولا زالت البل مع صناديد الرجال = غرب وشرق وبالجنوب وبالشمال
على غلاها القيد من فوقه عقال = ذخر لحكّام الدول واعيانها
الإبل لشيوخ القبايل والملوك = ولكل شهم ما تراوده الشكوك
مهما تعلاّ راس ماله في البنوك = حافظ عليها واعترف باحسانها
يا زين طاريها وزين اخْلُوقها = الجاهل اللي ما يقدر سوقها
مَن صِغْر قدرِه ما يَعَرْف حقوقها = جعْله يعاف لحومها والبانها
الرابح الرابح خذا منها قسوم = والإبل تاسمها القبايل بالوسوم
من عَهْد يوم الناس معطا ومحروم = تجددّه لـ.. أحفاد من جدّانها
هذا هو الشرح الدليل الأوّلي = ويتبعه وصف وشرح مفصلي
خلوني آلاعب عصاها واعتلي = والملحمة يبرْا لها برهانها
عوص القوافي من عدمها للوجود = وسايق فيها من المعنى نجود
حتى نوردها على حوض الورود = مثل الجمال نقودها ب.. ارسانها
تسمّعوا في وصف جرعات الحنين = من راس ذروتها إلى الخفَ الرزين
وقدم وخَلْف ومن يسار ومن يمين = وافعالها واشكالها والوانها
الناقة الناقة ويلقحها جمل = الأصل واحد والصنوف إلى قبل
لقاحها يظهر ل.. اهلها والفحل = على ثمان ما اختلف حسبانها
يصبح بها ذيل المعشر فوق فوق = لقاح لا فيها صبوح ولا غَبوق
لها فحلها لا يلوق ولا تلوق = وآخر سنَتْها حذَفت حيرانها
هات الشمالة بعد شَهْر مَعْ شَهَر = لبّ المحالب بالشمالة من حَدر
شَمالة مشخولة ومن الوبر = مروبعة ومثولثة جيلانها
في جالها الخلفي ومن بين الفخوذ = رباط ايمن فقارتها يلوذ
من الظهيرة له رباط وله نفوذ = السفه اللي يلتوي ب..قْرانها
وجيلانها اللي من يمين ومن يسار = تربط بثنتين تجيها بانحدار
الأيسر المبهل والايمن للقرار = موكدين شروطها واركانها
والكرسي الثابت يجي خلف السنام = منه الجنايب مدودها للأمام
هذا الظهر من بينها مثل المقام = ولها روابط والنحر ختمانها
وأمّا التوادي لو تكون من العشَر = أفضل من الليحان وأنواع الشجر
طول الصرار يصير شبر إليا انشبر = توداه وحده واختها ب.. وْزانها
الرقْف اقل بْـ" سانتي " من عرضها = والعرْض عن مركز ثلاث اغضها
والناس تلزم روسها وتحظَها = وتْثبت المقرون في فيجانها
واحلب وحيّن وانتبه ل.. حوارها = لولا لبنها من يعيش اصغارها
واليا انحرف راس السنة لدْوارها = هدّوا فحَلْها وافرُدوا حشوانها
مفرودها عمره سنة مهما يزاد = والعام الآخر حقَ والثالث وكاد
لِقْي والرابع جِذَع حسْب العداد = وفي عام خامس مثنية جذعانها
سنَ الثني في عامه السادس رَباع = َوفي عامه السابع سديس بكل قاع
واليا انتهى السابع خذ العلْم الوقاع = ثامن وتاسع شمخت نيبانها
تكاملت الأنياب فيها والسنون = وان عقبت عاشر عوام العمردون
يمكن إلى العشرين تاصل قد يكون = وعنها الطواحن حوّلت واسنانها
تلقح ثمان امرار من عمر طويل = وثمان خلفة وعشرة ما تستحيل
اليا استمرت من بديل إلى بديل = هذي حراوي قدرها وامكانها

البلْ عطايا الله جزيلات العطا = قطّاعة الفرْجة طويلات الخطا
ومْع ظلام الليل ادلّ من القطا = سفن الصحاري والذكا باذهانها
وارجع إلى عسفي ووصفي للذلول = اركب ظهرها ثم أعلمها الدلول
حتى تجي كنْها تقلْ لي وش تقول = خدمة هَنْوف ما تمدّ لسانها
اغير واطمر وان حذفت لها الخطام = تقف وقوف العسكري حسب النظام
لو من بعيد " اخ .. ابركي " تبرك شمام = مثل الرهينة في طلب رهاَنها
خلود اسَدْ وعْيونها مثل الخلاْص = وكنْها ليا قامت على كهرب وماص
وان دبّرَت ما عاد يلحقها الرصاص = وان لمسها العرقوب جنّ جنانها
ان اربعت تقول زاروقٍ سريع = على طمان الموج والموج الرفيع
إلا انها فيها من الذيب الجويع = خوّه وباعه وحْرِكةْ بِيعانها
أصيل ومعدّي زمان معْ زمان = بشْدادها مسْ الحقبْ هو والبطان
وَعْذارها اللي من ورا مقطع ل..أذان = واختم صريمتها تحتْ لحيانها
وابتد من احلاق الصريمة بالخطام = قَوْسه ثلاث امتار من ريش النعام
شِدّه ومدّه لا تهده يا الهمام = والوه على كرز علو امتانها
فجّا نحر حدْبا ظهر قطما خفاف = والعنق من عنق النعامة والزراف
كنّ الشجر من قدْمها يحذف اخلاف = من طويها البيدا ومن ذرعانها
صكّا الفخوذ البتر والذيل القصير = افهق عصاها من عصاها لا تطير
اديب لا تَرغي قليل ولا كثير = حمر الشنوف تسوقها زيلانها
ويْسوقها صوت المغني والطبوع = فزّازة فيها من الأدْمي رموع
في سمعها كنهم يصيحون الجموع = تخبط والارض تْرنّ من خبْطانها
مربوعة الجمْهاة ذاهنة الشبوح = في خشمها من سكبة السيف اللحوح
وليا اقبلت تغنج كما خطوا طموح = والوصف الآخر قايدة غزلانها
نُصب اذانيها وعلباها افطحي = والعَنق لاب.. احقد ولا هو منتحي
تَضرس وكْن حسَ الصريمة باللحي = أرشى دلي الري في علقانها
البل عطايا الله جزيلات العطا = قطّاعة الفرْجة طويلات الخطا
ومْع ظلام الليل ادلّ من القطا = سفن الصحاري والذكا باذهانها
ومن اصلها وعظامها وعزومها = سبع يخب ولا يخطل نسومها
مزوية مثل الرصاص لحومها = خبّا كلاها ما تنوش اثفانها
أخذْ شرابك واخذ زادك والزناد = بّ.. شْدادها والخرج تصلك للمراد
ومع دربها بعض الموديلات الجداد = خربت وذيك منزلة صيجانها
والجيش منها باطني وصيعري = وهيتي ودرعي وحر جوهري
مشكلة الألوان عجلات الجرى = انضا الجزيرة واصلها ب..عْمانها
وارجع إلى واجب طويلات الرقاب = المجهم اللي لونها لون الغراب
مصنقرات وكن اذانيها حراب = فنس الخشوم أقصى هو بِدْوَانَها
كنْها تمثّل هضب نجد من بعيد = هْيَ الخيار ولا تحطَ لها نديد
يا مستمع قولي عليّ الله شهيد = هذي شهادة ما نبي كتمانها
شهادة تومن بها سبع الأراض = واهل السواليف الطويلات العراض
ما احقر المغتر وواضحة البياض = في نوّها واخلوقها واثمانها
ودوّه ونووَه واجمع البلْ كلها = والسود فيها كلنا نفطن لها
مثل البيوت اللي يظلل ظلها = اللي ذراها وافي وكْنانها
ما هي تربّع في مضيق ولا شعيب = ابشر بعون ولون وابشر بالحليب
وعن غيرها تحتل حيضان القليب = وكل العدود الراسية عِدّانها
أحبْ مدهال لها رُبع الجنوب = ل.. أقبل شتاها وصلته من كل صوب
ما حبته موجة تحبه بالقلوب = محبة ما ينمحي وجدانها
جنوب من " رُغوة " شمال " السبعتين " = غربي "حفيت" ونصف شرق "الثلمتين"
رُبعٍ بعيد عن المداين والقطين = ما سرحت فيه الشواوي ضانها
وقام يْنتصب نيّها مثل التلول = وعبّت وعبّاها الشحم عرض وطول
صرح القوايم والعبا هدب الذيول = بِجّ اللهود اللي وساع ازغانها
هدف المناكب والمراكب والفقار = زوم الفخوذ المستديرات الكبار
وجنوب مثل جنوب سفن في بحار = اثنا مراسيها ورواجانها
خبط الخفاف ام الأناسيم العفاف = خفاف فيها حرف كاف بوجه كاف
سرية الا لمن فكّر وشاف = كون لمن كوّن جميع اكوانها
ريحة عَبسها فارق عن كل طيب = يا كم شفت من راس عمس ما يطيب
راي المجرب ما يعارضه الطبيب = والصدق أمانة ما ينجح الي خانها
مرباعها ربع بعيد عن الجبل = أقرب على "ريدا" وقرب"أم العبل"
و"يبرين" هي أقرب مواريد السهل = وان سندت نذكر بعض قُلبَانها
تارد على ل.."اطوا" و"قربة"و"يْدمَه" = وترد الحصينية وب"أخباش اقلمه"
"اقلمه" لي صار للقيط اكتمه = كم داجت المجهم على معطانها
تارد " مشَيْنيقَة " على عدٍّ لها = وتارد شروراً مشرب شفٍّ لها
وجال الوديعة فيه حيضان لها = غرب المضامي شرق من ضلعانها
و"زَمْخٍ" و"مَنْوخ" من حساب عْدودها = ياما وياما من قديم ترودها
مواردٍ كم رحبت بورودها = لا قامت الورقا تجُرّ الحانها
وان اشمَلت منها لها كم منهلي = على " تماني " وردها و"المنخلي"
وتشمل إلى "حمر انثيل" وتدهلي = مظامي متسعةٍ حدّانها
ولها موارد شَرق من "حمرانثيل" = "شوّالة" اللي ما وردها إلا دليل
ثم "العبيلة" و"معمورة" يا جزيل = انثر عليها مرهشات امزانها
وان أشملت من رُبعها الخالي قصاد = " خريص " و"رماح" لها غاية مراد
هذي مواردها القديمات الجداد = مناهل(ن) للإبل ولرعيانها
ولها من أعلى نجد " للرقعي" و"عرق" = سَهَلْ سَهَلْ ومقسمات فرق فرق
سُهول شبه المستطيلة غرب وشرق = دَمثات وكثير حفا قيعانها
مداهل تجمع من البلْ لون لون = ألوان حجّاج ل"مكة" يقدمون
الوصف واضح والأوادم يفهمون = الكلمة اللي يعتدل ميزانها
البلْ هي البلْ مال حكّام العرب = اللي تعبها راحة ما هو تعب
ما ضيعوها ابنا زيازيم السرب = حمّاية البلْ وارضها واوطانها
التسع منها خمس ل"نصاب" الزكاة = والعَشر ب"ـنصابين" من غير مغواه
وحسابها مهما تعلاّ مستواه = يزيد الأنصب ويعدا نقصانها
حكم بثالث فرض من خَمْس الفروض = والفرْض يكفي عن مضامين العروض
الحق للي يرغب الحق معروض = ما دامت الدنيا يعيش انسانها
والمعذرة ل..اخطيت في مختارتي = عن آنساتي سيداتي سادتي
وان حققت رضا العوارف غايتي = مالي ومال الغير من شتّانها
وإلى هنا صلاة ربي والسلام = على الرسول اعداد من صلّى وصام
واطلب من المعبود في بيت الختام = نصر ، وذنوبي نسأله غفرانها

وأسمحوا لي على ألأطالة

[بحوور]

ابو سعد



تســــلم على هالاختيــــــار المميـــــــز

لاهنـــــــــت ,,

وتستاهل التثبيــــــــت ,,





أختــــــــكـ

[ابو سعد]

الله يسلمش وتستاهلين الخير
وشاكرلش المرور يا أخت غاده

[بحوور]

ابو سعـــد


انا غيـــــرت توقيعـــــي

عشان البعض افتكروا اني

الكاتبه غاده السمان ...!




أختـــــــكـ

[عـزام]

عزالله انه وصفها من الى حتى زكاتها .

ابو سعد

صح الله لسان الشاعر الكبير على بن بلال اليامى

واختيار أكثر من رائع

تسلم يمناك لا عدمناك

[ابن مره]

انشهد انه به شاعر وهاذى ماهيب قصيده هاذي معجزه والابل مالها غير اهلها وبيض الله وجهك

[عيد بن شدقان]

ابو سعد
صح السانك والسان الشاعر الكبير ابن بلال
ولاهنت
اختيااار رائع

[ابو سعد]

الأخت بحور شكرا على مرورش على كل حال

[ابو سعد]

على فكره يا اخ عزام القصيدة خذا عليها الشاعر جائزة افضل وصف للأبل
شكرا لك على المرور وصح بدنك

[ابو سعد]

ووجهك يا بن مره وشاكر لك المرور