غـــيرك يـمــــوت

خالد بن جفن · #1 22-07-2012, 02:49 AM

كل عام والجميع بخير وصحه
أتمنى تحوز رضاكم

لك باح سدّي يا أتلع الجيد أوّيه =لك فاتحٍ باب الغلا ما قفلته
غيرك يموت اليوم والوّد ما أسقيه = وانت الذي صافي المشاعر نهلته
خذها حقيقه صافي الودّ أبديه = لك صادقٍ في كل بيتٍ فتلته
حتى ولو قلتي تراها مشاريه = للقلب تجرح يا حبيبي ذهلته
لك بعت ناسٍ قربها ما أدانيه = وبقربكم يازين فرحٍ أملته
أسهر لوجه الفجر وصلك أحاتيه = والعين لك تهمل دمعٍ جملته
أحسب نجومٍ في سماها تشاديه = لاغاب قمراها ونوري سملته
والصّمت لا خيّم على قلب مغليه = حتى الفضاء هو ضايقٍ بي جعلته
بين الحنايا ضيقةٍ بس تطريه = تكتم نفس روحي وهن لا عزلته
تشره على زود الوفاء يوم أعطيه = واخلاص نفسي ضايعٍ لو حملته
هذي مقادير الهوى لو تجاريه = قلب الوفي صادقْ وليتك زهلته
تصبح نهايتنا وتبقى طواريه = من حلم شوقٍ كل ليلٍ عقلته

خالد بن جفن