السلام عليكم ورحمة الله وبركاته
قصيده أعتبرها من قصائد السهل الممتنع
وهي تحكي عن نفسها
إليكم القصيده
على ذاك الرصيف .. أسهر وأنادي بكل الجنون القار=أكلم شارع خالي سواده من سواد الليل
ترى ماهو فلس ولا بقلبي قلت الأشعار=ولكن واقعي يفرض علي أكتب بلا تعديل
أنا راح العقل مني وعندي للجنون أعذار=معاناتي إذا بوصف يفوق الوصف والتعليل
من اللي قد وقف مثلي يواجه لعنة الأقدار؟!=رضى يبقى ويتحمل .. عشر أضعاف همه يشيل
من إللي ثبت أقدامه يقاوم شدة التيار؟!=ويعرف إن النخل وهو النخل راح وجرفه السيل
من إللي حب له طفله .. وحلم من يوم كانوا صغار=يتوج حبه بفرحه .. وأمه تحضنه بتهليل
يمر الوقت وسنينه تمر ويستوون كبار=ويتغرب لجل حلمه يسابق كل شباب الجيل
ويرجع رافع راسه بعد ما صار هو طيار=وبقى من حلمه الوردي زفاف يرفض التأجيل
يجيها يقول : حان الوقت تعالي نكشف الأسرار=طفح كيل الصبر ماعاد في صبري وصبرك كيل
ويذكرها بوقت صار مع مر الزمن تذكار=بأيام الطفوله يوم يغرقها غلا وتدليل
يمازحها وتردد له (ترى الكذاب يروح النار)=يجافيها وتهمس له (أعرف أن الجفا تمثيل!)
وتدمع عينهم لثنين يهلون الدمع مدرار=ترى الذكرى ولو حلوه طواريها تهد الحيل
وتسرح في وسط عينه .. تفكر .. ترتجف .. تحتار=يسألها عسى ماشر ؟ ويطيح من إيديها المنديل
وتنزل عالركب وتقول تسامحني على اللي صار ؟=حشا والله ماخنتك ولكنه حصل تبديل
تراها غيبتك طالت وتدري وقتنا غدار=كبرت وخفت تتأخر وخير البر بالتعجيل
ويشهق يلمح الخاتم .. يحس القاع تحته دار=ولا يستوعب الموقف بليا شرح أو تحليل
يسود الصمت .. ولا كلمه ونظره كلها إستنكار=شلل صاب اللسان وصاب كفين العتب تكبيل
دقيقه تمر طعمها مر .. نهاية عمر .. موت أزهار=خسارة حب .. ضياع فدرب ..نار تشب ..عذاب وويل
ويسرح لو بعيده تهون .. ولكن كيف بنت الجار=ويكسر صمته بصرخه تعدت في مداها سهيل
ويفقد وعيه وينزل على قاع الثرى منهار=مصيبه كيف يتحمل ؟! ترى ما بالأمر تسهيل
مابينه وبين غرفتها .. ممر ونخله وجدار=وهذا إللي يعذبه ويزود طينه بتبليل
يشوف إللي سرق عمره .. سكن وياها نفس الدار=غدى جار وله حق نزل في محكم التنزيل
ويتخيله يغازلها ويقول إنه عليها يغار=ويتردد صدى همسه ولمسه وضحكه وتقبيل
يناظر دارها وفكره ورا ذيك الستاير حار=وشباك الهوى عتمه بعد مازادوا التظليل
يقرر زوجها يبني ويرفع مستوى الأسوار=ويتصرف على كيفه عنده منهم توكيل
ومكسور الجناح إللي بلا ذنب يذوق أمرار=يصارع حسرته ويجر بعد ذيك الهزيمه ذيل
يفكر كيف طاوعها الضمير تكون شي ضار=بعد ما كانت لعمره عمر يحسب مداه طويل
خذت كل مابقي منه ومن عقله خذت الأفكار=وبرواز الوعد مايل خذته تخاف قال وقيل
عطت بروازه لغيره وخلت في الحشا مسمار=وآخر كلمه قالتها رجاءا ما أبيك تعيل
ورّد بكل غضب يسأل تحسبيني من أهل الثار ؟!=أنا وقتي غدا ملكي ولا يتحمل التعطيل
وداع الله وإذا بعدك مرض إيماني العطار=أنا لي رب ما يهمل بقرا كتابه بترتيل
وإذا كانت مسافات المنازل بيننا أشبار=لخليها سفر أيام وأساوي كل شبر بميل
وإذا قالوا علي مجنون أو ملبوس أو صابه زار=لناجي شارع خالي لوحده في توالي الليل
بقول إن الجنون أرحم كتبت من الجنون أشعار=وصدق شعري يتحدى الذي قال الشعر تمثيل
وأعيش العمر أرددها (ترى الكذاب يروح النار)=براءة كانت الجمله ولكنه حصل تبديل
حكاية عمري من يوم الطفوله لين صرنا كبار=في هذي الصفحه شفتوها وعايشتوها بالتفصيل
أبي شخص ينورني ومن أبياتي بس يختار=حرف ماشكى من هم ويبشر مني بتعديل
بعدها بعلن إفلاسي وبترك عالم الأشعار=لأني ماقدرت أعطي لحزني في الشعر تعليل
وبرجع للسرير إللي من غيابي شكى محتار=وأريح عين شوهها سواد يشبه التكحيل
وفي آخر بيت بسألكم عرفتوا ليه أناجي القار ؟!=قولوا للثريا من تناجي لو خذلها سهيل ؟!
تقبلوا تحيتي وتقديري للجميع
03-02-2008, 12:44 PM
,,, تـرى الـذكـرى ولـو حـلـوه طـواريها تـهـد الـحيـل ,,,
العرض المتطور
