((.. العلم نور .. )) واولى مشاركاتي ..!!

[حسن علي الهاجري]

السلام عليكم ورحمة الله وبركاته

اعزائي .. تحية عطرة

يشرفني انضمامي هنا في هذا الصرح الشامخ

واشكرك الشاعر الراقي فهيد بن عصيدان على دعوتي ..

وهذه قصيده متواضعه .. اتمنى ان ترتقي لذائقتكم الكريمه ..!!

:::::::::::::::::

الشّعر لـه رسـم ومعاييـر وفنـون=ما يسْبر اغـواره حـد ٍ غيـر ناسـه
ماهوب لعبـه بيـد خبـل ٍ ومجنـون=ألهـام مـن ربّـي ولاهـو دراسـه
مرّ ٍ يجي صعب وعبالـه ومشطـون=ومـرّ ٍ تزيّـن لـك بـدرّه ومـاسـه
واليوم يومه لا تقـل كيـف واشلـون=شيء ٍ طرالي والشعر فـاض كاسـه
أحس في وسط الحشا جرح وطعـون=من كثر من يشكي الزمـن وانتكاسـه
وهـذي عوايدنـا لهـا عـدّة قـرون=ننعـي الزمـان ونتهمـه بالخساسـه
والعيب فينـا واكثـر النـاس يـدرون=لو ان بعضنـا غـارق ٍ فـي نعاسـه
نفتربالدّنـيـا بـلـيّـا دركـســون=واحلامنـا مـال ومناصـب رياسـه
ومنها غرق فرعون واصحاب فرعون=ولا فادهم منصـب وجـاه وحراسـه
واجب على الانسان ما يتبـع الهـون=ويروح عمـره بيـن لعـب ووناسـه
العلم نـور ويهـدم الجهـل بالكـون=وكـلّ ٍ علـى قـدّه يفصّـل لبـاسـه
أحد ٍ عليه اللّبـس زاهـي ومصيـون=وأحـد ٍ فـلا يستـره حتّـى مقاسـه
وقد قالها قبلـي مـن النـاس مليـون=منهو غرس غرس ٍ بيجنـي غراسـه
وترى التعلّـم خيـر ياللّـي تعذلـون=ومـن يبغـي العليـا يقـوي أساسـه
والعلم أجره يا هل العـرف مضمـون=قالـه رسـول ٍ طهّـر الله انفـاسـه
ماهوب قـول ٍ مـن وكالـة يقولـون=وماهـوب كذبـة مدّعيـن السّيـاسـه
لكن كـلام الصّـدق فاللّـي يجـدّون=فعلـم الفضيلـه لا علـوم الدنـاسـه
بان النّمل والحـوت لأجلـه يصلّـون=وملائكـة ربّـي تسـهـل مـداسـه
ويـا طالـب ٍ للعلـم للعلـم قـانـون=يبغـي فطـانـه وانتـبـاه وكيـاسـه
واليا رماك ابليس في سهـم مسنـون=وخيّم علـى قلبـك وعطّـل حواسـه
اقرى كتاب الله ليـا صـرت مغبـون=يجلي همـوم القلـب يبعـد عماسـه
وجنّب عن اللّـي للمهالـك يجـروّن=وجنّب عن اللّـي عيشتـه باللّحاسـه
وقـت اللّـوازم كلّهـم مـا يسـدون=ورصيدهـم بالطّيـب بيّـن افـلاسـه
مفتون قابل لـه مـن النـاس مفتـون=لا عندهـم همّـه ولا بـه حمـاسـه
وبعض العرب لو كان له رمش وعيون=اعمى البصيـره مـا يدّلـه احساسـه
سفيه راي ٍ كـل يـوم ٍ علـى لـون=صافـي زلال الجـم لا جـاه حاسـه
ولا خير في اللّي يتبع الـذل والهـون=واللّي ينـزّل فـي المهمّـات راسـه
وختم الكـلام العلـم بالدّيـن مقـرون=وبالعلم ميّزنـا الذهـب مـن نحاسـه

::::::::::::::::::::::::

((.. اخوكم / حسن بن علي الهاجري .. ))

[مناحي الصميل]

اولا :


مرحبا بك مليار يا حسن الهاجري

ويشرفنا إنضمامك الينا .

كما نشكر الشاعر فهيد بن عصيدان على دعوتك .


ثانيا :


صح الله لسانك حتى ترضى

مشاركه اولى جزله ورائعه بها الكثير من الحكم والواقع اللي نعيشه .

اخيك .

[عــقــيــد]

يامرحبا والله ومسهلا
صح لسانك يالهاجري قصيده قمه فالتمكن والابداع

مرحبا بك بين أخوانك ولاتحرمنا من جديدك طال عمرك

[(هاوي قصيد)]

حسن علي الهاجري ,,,

ارحب يابو علي , وسعدنا بنظمامك لـ هذا الصرح الشامخ

صح الله لسانك ولاهنت , جزله ومن راس جزل

تقبل مروري بكل ود

[ناصر بن فالح]

ارحب

صح لسسااانك يا ابوووعلي على ذالقصيده


ومبدع دائما

بيض الله وجهك

[سعود الجوفان]

مرحبابك بابو علي

حياك الله معنا يالشيخ

وصح لسانك على القصيده الطيبه

واشكر الاخ فهيد بن عصيدان

على الدعوه الكريمه

بإنتظارك يالشيخ

تحيتي

[ᄽزعفرانᄽ]

..صح السانك .... ولا هنت .... ع ....القصيدهـ الجزله

ننتظر جديدك بفارغ الصبر


@....تحياتي....@

[DUNHILL]

ارحب يامحلفي
وصح لسانك يامبدع

[فلاح بن ملبز]

ارحب يا حسن

وصح لسانك على ذا القصيدة الوافيه

ولاهنت

[مبارك بن مجروب]

صح لسانك يا الشاعر قصيده جزله وابيات قمه وماعليها كلام

اشبعتنا شعر واشبعتنا حكمه فعلا ابيات تتماشى مع الوضع الراهن ونحن بحاجه الى مثل هذه القصايد الهادفه ...

لاهنت على ابداعكـ
ولاتحرمنا من جديدك

تقبل مروري ,,,,