اغيب وابعد للشآعر حمد بن صآلح المري

سلطان ال شريد · #1 02-08-2011, 03:57 AM

السلام عليكم ورحمة الله وبركاته

بعد غيآب فتره ..

اجيب لكم هآلكآيفه

قصيدة جميلة للشاعر حمد بن صالح المري....

تستحق التثبيت
...

اغيب وابعد وانشغل واحاول انسى مانسيت
ماتنسى ذكرى السنين اللي معك قضيتها

حاولت كم مرة وكم مرة ولكن ماقويت
حتى لو ان ذكراك مامرت علي مريتها

ان كان عندك حل قلي سو كيت وسو كيت
في ذمتي ماعاد به سواه ماسويتها

وشلون وانا كل ماتطري علي مت وحييت
لو أن معي قدرة على نسيانها نسيتها

ماهو بسيط فراق من بنيت حبه بني بيت
مرتاح من صبك لسيسانه ومن تثبيتها

ويروح في لمح البصر ويضيع منك مابنيت
وسود الليالي عقب بيتك تدخلك في بيتها

وان قلت هذا واقعي رضيت ولا مارضيت
ياليت نفسي تقتنع باللي حصل ياليتها

من حظي العاثر تخيّرت ابعد الناس وهويت
والوقت قاسي والسنين العوج ماهميتها

ياليت عندي علم وش بيصير لي ولا ياليت
ثنيت رجلي من بدايتها ولا عنيتها

قلي وش آنا مستفيد من الفراق ووش لقيت
غير المشاكل والهموم اللي علي جريتها

ولا تعال انشدك وش خليت عندي ماخذيت
حتى السعادة خذتها مني ولا رديتها

ماعاد باقي كون نار جمرها منه اكتويت
وان شفتها بتموت ويموت الجمر كريتها

وان احسبنها سالفة خلصت منها وانتهيت
وارتحت من كثرة عناها واثرني بديتها

ذبحت نفسي وبيدي حفرت قبري مادريت
وجروح صدري كلها من خنجري لقيتها

وتبغاني انسى؟ والله ان اموت وانا مانسيت
ماتنسى ذكرى السنين اللي معك قضيتها

محبتك بتعيش في صدري وتبقى مابقيت
فالقلب زارعها ومن دم العروق اسقيتهاٍ

قرناس العازمي · #2 02-08-2011, 04:01 AM

وعليكم السلام ورحمة الله وبركاته

صح السانك وطاب منقولك

مطلق الخالدي · #3 02-08-2011, 06:05 PM

صح لسانك ولسان شاعرها
ولاهنت ع النقل الرائع
تحياتي,,

أوراد · #4 02-08-2011, 11:23 PM

صح لسان شاعرها

يعطيك العافيه ويسلم ذوقك لاهنت

روح مغليها · #5 03-08-2011, 12:14 AM

"

وتبغاني انسى؟ والله ان اموت وانا مانسيت
ماتنسى ذكرى السنين اللي معك قضيتها

محبتك بتعيش في صدري وتبقى مابقيت
فالقلب زارعها ومن دم العروق اسقيتهاٍ

::

الله عليك يَ سلطآن ،،/ إختيآإر قمَه في الذوؤق
وصح لسآن حمد ملآيين على هـ الكآيفه
لآهنت ،، } . .