حاولت اغيّر فيك من كثر مغليـك

نادرة المزايا · #1 10-06-2012, 10:50 AM

مدخل,,

منك السموحـه والعـذر ياضنينـي
النفس طابـت ليـن قلبـي عذرهـا

ماعـاد باقـي شـي بينـك وبينـي
وانكان لك حاجـه تعـال اختصرهـا

اخذت من عمـري حـلاوة سنينـي
كافي علـى قلبـك اليامـن ذكرهـا

البارحه مابيـن وشلـون يمديـك
في يوم واحـد ياحبيبـي تغيّـرت

الليـل خلانـي وخـلا طـواريـك
تلعب بقلبي كـل ماداخلـي ثـرت

'سويت شين حدني غصب ماجيـك

والا قبـل لاسيـر الليـل سيـرت

هدمت كل اللـي بنيـت بتجافيـك

هدمـت لا والله بالعـون دمـرت

خليتني ماقلت لي شلـون اخليـك

ليتك بحالي قبل مارحـت ناظـرت

الله كريم يصبـر اشـواق مغليـك

لاقـام ينثرنـي غـلاك وتناثـرت

والله يسامح قلبي اللـي مواليـك
اخذت كل اللي تبي منـه وانكـرت

منهار جيت العام تسبق خطاويـك

واليوم ماكنك قبل جيـت وانهـرت

في ذمتك لامن تذكـرت ماضيـك

من يطري في بالك اليامن تذكرت ؟

من كثر مافكرت وشلون اراضيـك

وياك في نفسي ولا يـوم فكـرت

على كثر ماكنت متمسكـن فيـك

وعلى كثر ماحتجتنـي ماتعـذرت

جيتك وعندي حاجتن بيـن اياديـك

والمشكله تقدر عليهـا وقصـرت

رح بشر اللي ملتفت لـك يناديـك

قله تركتـه لخاطـرك ماتأخـرت

صدقني انها غلطتي يـوم اداريـك

ولا انت لولا غلطتي كان ماصـرت

كبرتـك بعيـن البعيـد وحواليـك

ابيـك تكبـر والمصيبـه تكبـرت

حاولت اغيّر فيك من كثر مغليـك

قـدرت لكنـك عليّـه تغـيّـرت

مخرج,,,

توك تجي .. واتقـول انـك تبينـي
وين انت يوم النفس تشكي كدرها ؟؟؟

كنـت اترجـى تتصـل يـوم فينـي
كنت بحياتي غير .. قبـل اتهجرهـا

خـلاص لا تتعـب قدمـك وتجينـي
كنت احترم جيّتك .. وصرت احتقرها

سبحان مـن خـلاك عـادي بعينـي
من عقب ماكنت انت تسوى نظرهـا

للراقي//ثامر شبيب,,