الشاعر والربيع

[الفارس الهاشمي]

قصيده للشاعر الكبير / الشيخ الشريف فيحان بن عبدالله بن منصور بن لؤي

عند العشي عديت في حشه ابقار
رجما زما بين الخرج وايسر النير

ما ودي ابمبدا الرجم والتذكار
لكن مالي حيله فالمقادير

لين القلم بالحبر وسط الورق سار
وعبرت عن ما يخفي الجوف تعبير

يا راكب الي لشتغل والكفر دار
ثم دار هوبا فيه ستت مسامير

يدني ديارا دونها البعد واخطار
اليا نهض صدرة مثل خافق الطير

هافا من الستات ما غيره اخيار
توه جديدا بالسند والفواتير

ممتاز طبلونه من الجلد له غار
وصفرا على سقف الغمارة مناحير

يسوقه الي شاطرا فيه بيطار
ما تختلف يمناه في نقله القير

غمرا سدادا ويتشوق للاسفار
ويقضي اللوازم للوجيه المسافير

من عندنا يسرح ابمكتوب الاسرار
لنباج نور الصبح واصبح على خير

دربك مع التيسير مع سكه القار
مع المزفلت وانتبه للسيايير

قدمك عفيف تصبحه وقت الافطار
افطر واخذ بنزين واسرح ابتبكير

وليا فهقت قصور ظلم افرق ايسار
مع عبله معها يجيله معاصير

تاطا الغبايا والضحى تلفي الدار
ملفاك ابو سلطان سعد المسايير

ظفرا شجاعا يكرم الضيف والجار
وحلااال عسراتا بحيله وتفكير

واليا قلطقك فالمجلس وولع النار
عطه الكتاب وقل ترا ربعك بخير

وقله تراهم منتوينن ابمحدار
الهاف بالحمله يباري المظاهير

يم الربيع الي تجي منه الاذكار
حلنا بذودا فيه رمس المغاتير

ذيداننا ترعى على اثرنا الاقفار
والهاف يتعب لاجل شف المصاغير

لعل نو الصيف يومر بالامطار
نوا يخرج من مناشيه مخضير

ينشي من القبله لمزنه تزبار
وتصبح امزوونه غب نوه مزابير

يومر بسيل البعث خيرا بلا اضرار
ياخذ شهر بالوبل مزنه مصاخير

واليا اختلط نبت المسايل بالازهار
وقام الزهر يركب ظهور النهابير

حتى لكم نلد بسباق الانظار
ونقبل مسانيدا بعد ذا المحادير

لديارنا الي ما نبي غيرها دار
دار مساس ومهتنا للمعاشير

ما كفته غرب اليا ضبع وايسار
وما اقبل بها غاير وكفت معاشير