(( هـــتــــــلآن )) ,, ربعـي كما رزم الرعد وسط الأمـزآن

[احمد بن جوفآن]

السلام عليكم ورحمة الله وبركاته

.
.

مـسـا الخيـر ,,

.

قصيـده جات تلقـائيـَه ,, ومهداه لكم ولكل من ذكـر فيهـا ,,
توضيح / مدحت فيها ربعي ولا هو عيـب ..
و مو معناه مذمه بالغير .. والرجال وشهو دون ربعه ولابته ..

تفضلـو ..

الـراس يطبخ واحتمت .. جل الاوزان=كن السطر فالراس .. يرسل نذيره
وجريت طاروق على ذيك .. الالحان=وفاح القصيد بريح مسك .. وعبيره
شاعر وبيتي مايجي كود .. مليان=يوم الجزاله مع قصيدي .. خشيره
مبطي وانا لشـَعر ماني بـ / ظميان=اشرب زلال الشعر من وسط .. بيره
وراسي من النوماس والعز .. بطران=ترَك صبي ٍ ما يجي فيه .. غيره
وعن الدنس والعيب .. غضيت الاعيان=مدام قلبي يستحي .. من ضميره
وما يستضيق الصدر .. وانا كحيلان=ونفسي من العزه فلا هي .. فقيره
وإسمع وانا بعطيك .. نبذه وعنوان=( والهرج يكفي صامله عن كثيره )
دم الحميا وسط .. عرق ٍ وشريان=أزهم واشوف جموع قدمي .. غفيره
ما اسمع الا قولة .. ابشر ياذيبان=وحذف الغتر والروس .. تطبخ سعيره
قلته وانا من دون ربع ٍ .. لهم شان=هم محزمي والعين تمسي .. قريره
خيـَالة البلها هلي صلب ( هتلان )=دوم الكبيره في نضرنا .. صغيره
ربعي كما رزم الرعد .. وسط الامزان=ربعي كما حدب السيوف .. الشطيره
من انس لكن لااحتمال الهوش .. من جان=وما يذخرون الروح .. عقب الذخيره
عجلين مفزاع ٍ .. و ذربين الإيمان=وقصيرنا ماراح يشكي .. قصيره
و نزبـَن الجاني ولو كان .. ما كان=ولو إن محد ٍ فالآوادم .. يجيره
و كم خايع ٍ خطر ٍ لنا فيه .. ذيدان=والي بغاه وشافها .. شاف غيره
و بيوتنا مدهال طرقي .. و ضيفان=ونشوم عن فعل .. العلوم الحقيره
ويوم البيارق ترتفع وسط .. ميدان=وكل ٍ يفكر يا ترى .. وش مصيره
وصفو وصفينا .. مجوَخ و فرسان=ومنهو سحب سيفه .. يهمـَل جفيره
خيـَالهم لا هدو الخيل .. ثم بان=لا شافنا قدام .. يقصر مسيره
والبيت ما يبنا وهو دون .. عمدان=محروم منهو دون ربع .. و عشيره
ولي لابت ٍ لاقلت ( عجمان .. عجمان)=الاوله غصب ٍ تصير .. الاخيره
قوم ٍ فعايلهـم تخلـد .. من ازمـان=من صلب ( يام ) .. اهل الوجيه السفيره
كل ٍ يقول ولكن الفعل .. برهان=وافعالنا تذكر .. بـ / وسط الجزيره
هذا ومابه فالعرب .. اي نقصان=والطيب له منزال في كل .. ديره
وختامها لاهنت يا راس .. جوفان=ورثتني بالطيب فعل ٍ .. و سيره

.
.

احمـد بن جوفـان