صغيرنا ينطح من القوم فرسان / وكبيرنا يلحق كبار الخساير ( مصافحه أولى )

[ماجد المهنا]

السلام عليكم ورحمةالله وبركاته ..


مسيكم بالخير يالربع ..


أخواني ..


يشرفني ان اضع بين اياديكم هذه المتواضعه ..


قصيده في جماعتي ( آل مهنا ) .. ولا عليكم زود يالربع ..


اتمنى ترقى إلى ذائقتكم ..


صلو عالنبي ..


اخوان سارهــ ..

حنا( بني مهنا ) إلى ثار دخان = وحمى الوطيس وثار بالكون ثاير
نرقا سنود المجد لو كان ما كان = ونبني صروح العز مثل العماير
صغيرنا ينطح من القوم فرسان = وكبيرنا يلحق كبار الخساير
اخوان ساره بنت ذربين الايمان = سم الكبود موردين العباير
لا جا نهارٍ يفزع اخوان لـ اخوان = وبرق السيوف الشامخات الشطاير
مفرقين الجمع لا جو عدوان = سقم العدو اللي بغا الشين زاير
عاداتنا لامن عوى الذيب سرحان = سقنا عشاه الروس لاجت تطاير
رفيقنا عزه على طول الازمان = حنا دروعه كاسرت كل غاير
قمنا بحق الضيف مع حق جيران = واهل الكرم والطيب مثل المناير
هاذي عوايدنا إلى ثار دخان = سقم الكبود موردين العباير

وسلامة روسكم ..



* اعلمو اني لو كتبت بجميع لغات العالم لن أوفي جماعتي ذره واحده !؟


أخوكم /
ماجد بن عبدالله بن جلوي المهنا الشكري الدوسري ..