أنا بدوي ورغبتي في المواشي...عوص النضا وأربي العنز والشاه

[الباشا]

السلام عليكم ورحمة الله وبركاتة........

عندما تحكم المدينة قبضتها يلجأ البعض إلى الهروب إلى البادية للترويح، ولكن عندما يأتي رجل من الانطلاق إلى قيود المدينة فإن الوضع لا يطاق , وقد صورها الشاعر في قصيدتة هذه :

أنا بدوي ورغبتـي فـي المواشـي = عوص النضا وأربي العنز والشـاه
وأشد وأنزل فـي دمـاث الدشاشـي = وأشوف بالدربيـل مرتـع رعايـاه
ومنهـا نزلـت بفلـةٍ وأبتـلاشـي = لا عـاد منزلهـا ولا عـاد ملفـاه
وضاقت بي الدنيا وكثـر النقاشـي = وأشكي علـى ربٍ خلقنـا وعبدنـاه
يا ناس خلوني مع الـدرب ماشـي = وأنظر بعيني مازما مـن حجايـاه
ممشاي في جـوٍ سقـاه الرشاشـي = برقه من القبلـة تضاحـك ثنايـاه
في خبـةٍ فيهـا بسطـت الفراشـي = وشبيت ضوي والمعاميـل مركـاه
جبرٍ حطبهـا مـا نجيبـه قشاشـي = والمي من غـرّ السحايـب روينـاه
والجيب واقـف راكبينـه بلاشـي = متخيرينـه بالدنانـيـر مـشـراه
يا طوي متاريس الوعر والهلاشـي = ويسبق خفيف الريش لا زاد ممشـاه
لونه بيـاض وخالطـه بالرقاشـي = جابه جميل وطمغتـه فـي محيـاه
والله مـا غبـط الملـوك البواشـي = لـو حكمهـم كـل الأوادم تمـنـاه
ورزقي على رزاق ضعفاء الخشاشي = يعطي الكثيـر ولا يمـنّ بعطايـاه
مـن أول لبسـي جديـد القماشـي = واليوم لبسـي مـن توالـي بقايـاه
عزي لمن دوبح عظامـه هشاشـي = وأوشك على بيـره تنـوح مطايـاه
ما رافقه صلبـه ولا لـه معاشـي = وشاف العلوم القاصره مـن دنايـاه
بنصحك ياللي لك ضميرٍ وجاشـي = أخذ النصيحـة والحـذاري حـذاراه
أبعد عن الانذال خـوف وتحاشـي = لا يوقعونك فـي متاييـه مضمـاه
لا تنخدع بأهل الوجيـه الغشاشـي = الكـل منهـم سلـم الغـدر يرقـاه
النذل لو يضحـك بوجـه بشاشـي = تراه جدرٍ منهـار ساسـه ومبنـاه
اللاش لاش ومنتجـه راس لاشـي = متسل سل من بين الاثنيـن مجنـاه
الضبي راسه مـا يجيبـه عراشـي = خله يولـي لـو تقاربـت مرمـاه
وأعنز على الطيب ولا أنته بنحاشي = يا قف معك بالحال والمال والجـاه
خاله نشا بالطيـب وأبـوه ناشـي = منهم وفيهـم تفعـل الطيـب يمنـاه
يبرك جمل وإن قام ماهوب حاشـي = حملـه يشيلـه والعلايـق تـعـلاه

الشاعر: عبد المحسن بن سليمان القويفل