الزمن هذا زمن ما لا يصير ..! ( new )

[خالد بن رمثان]

السلام عليكم ورحمة الله وبركاته




مساء / صباح الورد

و كل عام و أنتم بخير و عساها سنة خير للجميع ..!




أترككم مع النص البسيط و المتواضع لعله يحوز على رضاكم ..!



.



.

الصداقه و النشاما و العشير=و الوفا و الصدق و سلوم الرجال
و الكرم و الضيف و حقوق القصير=كلها عند السنافي راس مال
و الزمن هذا زمن مالا يصير =تبرك البكره على روس الجمال
و الكفو تلقاه فالصف الأخير=ما خدمْه الحظ في سود الليال
طير لكنّه كسير و ما يطير=القدَر كسّر جناحه يوم طال
و السفيه نصّغره لو هو كبير=الحصا ماهيب في حجم الجبال
بين خلق الله ترى ما هو قدير= و ما يذوق من الدلال ألا الحثال
معتنز في ضلع لكن من حصير=كل ما هبت عليه الريح مال
و الرَجل لامن عصا راي الشوير=والله إن يبطي على رد السؤال
يالبنادم لا ترددت إستخير=لجل ما تتعب على صعب المنال
و يالبنادم عمرك إن طوّل قصير=إغتنم خيره قبل شد الرحال
يالله إني طالبك و أنت المجير=لا تروغ خطاي عن درب الحلال
طالبك و أنت الغني و أنا الفقير=خلني ممن يجي تحت الضلال
تجري الدنيا و من فيها يسير=يحسْب إن ما فيه موت و لا زوال
و ألا أنا منها تعلمت الكثير =لين صرت أعقد و أفك إمن الحبال
ما نصيت إمن الجموع ألا الغفير=و ما حملت إمن الحمول ألا الثقال
و ما قنيت إمن السيوف ألا الشطير=و ما كتبت إمن القصيد ألا الجزال
أنسج أبياتي بسلكٍ من حرير=و أنفرد فالواقعّيه و الخَيال
و أبتسم للناس لو ماني بخير= لو جروحي دمها فالقلب سال
و الزمن يصفع بلا سابق نذير=و الدليل وجيه عسرين الرجال

.


.

و سلامة قلوبكم

.


.