مجاراة للشاعر عباس بن رشيد ال عمار

[محمد ضرمان الشولاني]

هذا مطلع قصيدة الشاعر عباس بن رشيد ال عمار

يا هجوس الشعر روحي للجنوبي=صوب قرمن غالين دايم علينا
مفلحين يملك الصدر الرحوبي=محزمي بالضيق هو منا وفينا
الله اللي عالمن سر القلوبي=نعبده ونصوم حنا المسلمينا
من شمال المملكة حد الجنوبي=يحفظك ربي إله العالمينا

وهذا ردي على القصيدة

مرحبا ترحيبة الغيث السكوبي=ساقه الوالي عقب دهرن وشينا
بالرفيق اللي مراسيله ندوبي=وعن جزيلات القصايد ما سلينا
يا عريب الجد يالحر الصعوبي=ما يصيد الا الجزايل باليمينا
محزمك يا مسندي شلفا عطوبي=تعطب العايل وتظفر بالسمينا
لابتك مفلح محيرة الشعوبي=سعد من عنّز على مفلح وجينا
قومنا العجمان والذكرى تنوبي=سطر التاريخ مجدن يهتنينا
ندحم الهيه على خيلن تجوبي=ساحة الميدان ما نثني يدينا
قادها راكان والبيرق لهوبي=فارس الميدان والقرم الفطينا
والحرايب من جلايدها خضوبي=والسيوف العوج تبطش بالجبينا
والجبال الراسية غصبن تذوبي=من دكايك خيل قومن ما تلينا
والبحار إليا وطت يام ٍ تروبي=ويخضع إلصبيانها برن ومينا
والصبي فينا ورى العليا طلوبي=وعن دنيات المطالب شايمينا
والجبان إليا تبين به رسوبي=يِنحر بعادات عرف الاولينا
وللخوي في عرفنا قدرن وجوبي=ما تضيق إبْه الوسيعه ما حيينا
ونكرم العاني وطرّاق الدروبي=وننحر القعدان والجزل السمينا
ويامن الزابن علينا والطنوبي=يوم قصران الشوارب عايفينا
والهنوف إليا رمت شال النحوبي=نشرب الموته من اكواب اليقينا
وشيخنا من عادته فك النشوبي=يجزل المدات مرخص للثمينا
وللقبايل عندنا قدر امحسوبي=موجبه حقن وجب منا وإلينا