كذبة .............جديده ..؟!!

[مطيرية وافتخر]

جاني يهنّيني على غيـر عـاده
يقول (مبروك الشهر) يا عنيـده
مدري هداه الله بشهـر العبـاده؟
ولاّ نوى قلبـي بكذبـه جديـده؟
عيني تقول انه صدَق فـي وداده
وحنّ وتذكّرني .. ولا هي بعيـده
وقلبي يقول ان التجافـي مـراده
والمسأله في كل بساطه ..مكيده
احترت مدري وش خفايا فـواده
كنّه مسك حبـل التفاكيـر بيـده
وعجزت أميّز مزحته من وكـاده
أخايل بروقه ولا اسمـع رعيـده
ما ودي أبعد وأحترق من بعـاده
ولا ودّي أقرب وانصعق في جليده
شهرين أصارع لوعتي بابتعـاده
أبكي قصيـدي وآتذكّـر قصيـده
شهرين كدّر خاطري في عنـاده
لين أستويت بطول صبري فريده
شهرين عدّن ما لقيت استفـاده
غير النكاده ويش انا مستفيـده؟
شهرين أنادي صورته يا جمـاده
قوليله اني ضايعـه يـا بليـده!
وقلبي على الأيام معلن جهـاده
والسيف شريانه ودرعه وريـده
كنـه يـدوّر بالغـرام الشهـاده
ولاّ يـدوّر ثـار نفـسٍ فقيـده
إمّـا حياتـي بالهنـا والسعـاده
ولاّ مماتـي بالمـودّه شهـيـده

ودمتم بكل ود..احبتي ...