يقول ابن خنز لكم من مثايله = مثايل تبقى ليوم القيامه

[الـــكايـــد]

يا الله اجرنا من عذاب القيامه = ياجابر( ن) عظم يهول انقسامه
ارحم عبادك يا ملاذ الخلايق = في حزة كل (ن) صلا النار ضامه
وانك تقدرني على مابغيته = والعبد تعرف قوته من صيامه
يقول ابن خنز لكم من مثايله = مثايل تبقى ليوم القيامه
تواردوها الناس جيل ورى جيل = تجارب أهل الجوخ وأهل العمامه
اصفها وأدرى عليها من الخزى = من شان ترضخ للزعيم الزعامه
صغت القوافي من تجارب مجرب = نوادر وانا براس العدامه
دارت سنيني لين هوزت الثلاثين = وتفسرت قدام راسي حلامه
وقمت اعتزي وأقول وين الرفاقه =والحق زمان الغابرين الملامه
وأختر من بين التجارب تجارب = كل (ن) على ماقيل يفقد كلامه
تجاربي عن الصديق الموالي = وعن هقاوي محتمين الجهامه
عينت مابه مثل فعل ال مطلق = لما ارتفع صوت النعت في غسامه
حماية الفطر كبار الهقاوي = كل ابلج تلقى خواله عمامه
وعينت من بين القبايل نوادر = من الكويت لنجد لقصى تهامه
وماشيت خلان وعقبت خلان = وكسبت والنعمين من كل هامه
ولا نصاني واحد في مكاني = الا وقلت ابشر وحقق مرامه
افزع وأوقف دون الاقصى والادنى = نور مراسيله تبدد ظلامه
وبذرت معروفي وصديت منه = قصر بنيته ليه ادور هدامه
تسمعو يا اهل العقول السليمه = زبدة كلامي قبل ادون ختامه
كل (ن) يقوم بواجبات ابن عمه = تكفون يارمز الشرف والشهامه
لان ابن عمك فزعتك قبل غيره = ياسعد من يام العريضه حزامه
انصح كبار القوم من برزة الردى = من قام فيها ماجنى الا ندامه
قومو بواجب كل عود موقر = العود من حقه عليك احترامه
وتشاورو في الراي والراي صيده = ومن جاب راي العز فكو لجامه
وجمعى بني عمك تعزك وترفعك = والجمع لو فرق يبين انهزامه
فتجمعوا على النقى والحميا = وحطو وجيه الِشامتين الجهامه
وسقو ركايبكم على كل وجهه = العد من دونه ثمانين قامه
والنادر الحر يتنقى خويه = قرم شجاع قاسيات عظامه
لما حداه الوقت واشتد ثم قسى = ينصاه ويعزه ويرفع مقامه
لان الخوي الزم عليك وعلينا = يقطعك ياهرش قصير خطامه
والوالدين افضالهم مغرقتنا = واذكارهم مثل النفل والخزامه
امك لزوم تبرها يا ابن آدم = حق وشرع الله عليك التزامه
وابيك لا تنسى وقاره وبره = خصه بوقفاتك وطيب وكرامه
أختار لك في مرقب العز ماكر= البس وسام الطيب واحفظ وسامه
ولا تزوم النفس لي كثر مالك = احذر ترا المولى سريع انتقامه
واختام ماقلته صلاة على النبي = هذا الختام المختصر والسلامه