ليت مالي كثر مال الوليد ابن طلال..؟

[سالم بن جخير]

يالله التوفيق والستر والرزق الحلال= والتمسك بالهدايه وبالراي الحكيم

وبالجناب السمح والصدق وعلوم الرجال= وخوة الطيب وممشى الطريق المستقيم

كل هذي كنها الكيف من صفر الدلال=وكنها البراق لا لااح فالليل العتيم

لاشموخ الا شموخٍ مثل شم الجبال= ولا نديم الا نديمٍ مهوب اية نديم

من تنصى طيب الراس يبشر بالجزال= ماله الا اللي يرد البرى عند الخصيم

ومن تنصى بارد الراس يبشر بالهزال= راح له حاله سقيم ورجع حاله سقيم

احدٍ لاجيت صوبه وقال الشي طال= واحدٍ لاجيت صوبه يزيد الضيم ضيم

ليت مالي كثر مال الوليد ابن طلال= كان عيشت الفقارى بجنات النعيم

صح انا شاعر والى جيب للشاعر مجال= قالوا ان الشاعر يهيم فالوادي يهيم

افتخر فالشطر الاول وفالثاني مثال= والعقل ياهل العقل قيل فالجسم السليم

غير انا مانيب طيب ولا ذالحال حال= ابتدابي جرح زودٍ على الجرح القديم

عزتي للي سواتي بهمه لايزال= والله اللي يعلم الحال والله بي عليم

كل ماوجهت واحد يوجهلي سوال= وش بلا حالك ياسالم مسوي لك رجيم

ناس فالدنيا يعيشون في برد وظِلال= وناس فالدنيا ولكن يصالون الجحيم

يالله اني مستعيذك من ادروب الظلال= احمني يالله من كل شيطانٍ رجيم

ذنبي اني صرت طيب وطيبي راس مال= لين صرت اشوف نفسي على الدنيا يتيم

كثر حكي الناس عني وانا ياهم الا ل= اتغيشم واتغيشم وان ماني غشيم

يااولو الالباب وان كان جابولي مجال= يااولو الالباب فل يتقوا شر الحليم

يالهجوس اللي نويتي تشدين الرحال= وين قولي وين والشعر في صدري مقيم

والله اني كل ماضقت ذبيت الطوال= ماتسمع في عبادي ولا عبد الكريم

والقصيد احيان ياتيك من وحي الخيال= غير انا صادق ليا قلت والله العظيم

وانت ياللي يوم جيتك وانا كلي وصال = والله انه مايرد الكريم الا الئيم

انتبهلي واستمعلي و سجل مايقال= واعرف ان الجو صافي ولا فالجو غيم

اعتبرها نصح والفال يتلاه العقال= وكلمة العاقل ليا جات جاتك فالصميم

الوفا والطيب والعز من طبع الرجال= والتغلي والغلا والدلع طبع الحريم

سالم بن جخير