ياعيد يانسل الكرام الاجاويد = وافي عسا ايامك معانا مديده
سبقتني بالوصل والطيب ياعيد = مرباك بيّن بالفعول المجيده
وان كان به تقصير. مني تواكيد = عقب الجموع اصبحت منكم شريده
لكن غيابي غصب ماهوب بالايد = الظرف يحكم بالدروب العديده
لو هو بكيفي ماقبلت التحاييد = ودرب العباله ويش ابي فيه أحيده
ماحادني غير الهموم المكابيد = في خافق ٍ دمـّـه خثر في وريده
نيرانها بين الحنايا مواقيد = نوب ٍ تلجّ ونوب كبرا وقيده
ياعيد عشت العيشه اللي تزاهيد = من وين مالقيت وجهي زهيده
مابي ردا بس الحظوظ المقاريد = تجذب خطاياها ولوهي بعيده
ياما حفت رجلي وانا امتّر البيد = من غير راي وغير جمله مفيده
ولا هقيت انفوس ناس ٍ حواقيد = ربع المصالح والقلوب الجحيده
كنت احسب انهم وافيين المواعيد = وبيّن لي الله حقدهم والمكيده
وغير الزمان اللي صدوفه نماريد = ادلى عليّـة بالحياة النكيده
ياعيد لو تكثر علي التناشيد = مالي جدا ياخوك غير القصيده
اكتب لك اللي به عيوني شواهيد = وسود الليالي لو تكلم شهيده
ومن واجه الدنيا بصبر وتصاميد = هذا وليده من سلايل وليده
وسلامتكم
الشاعر سعود ارتيبان الجوير
العرض الشجري