حاول فضحها ............فبلاه الله

[الوطن]

حاول يفضحها ...فبلاه الله ...فكانت المفاجئه في النهايه

يقول اخونا راوي القصه انه كان في زياره لاحد اقاربه في المستشفى ....

مر الوقت وجاء الدكتور كعادته يزور المرضى ...

...قعدنا ناخذ ونعطي الين اعجبته السواليف وجلس...

سألته وش المواقف العجيبه الي مرت عليك..؟؟

قال قلي وش النوع الي تبيه حوادث..امراض نفسيه..قصص..؟ وش تبي؟؟

قلت اعجب ما مر عليك خلال عملك بالمستشفى..

قال الشي اللي مو طبيعي ومر علي خلال 13 سنه عمل بالمستشفى هو:

انه مره احد المرضى شاب عمره 22 سنه جاء يستشيرني بخصوص شي اعتقدت بالبدايه انه بسيط وعلاجه سهل

هو انه حسب ما قالت لي الممرضه قبل ما يدخل انه فيه بقع خال بيده ويبي يستشيره بأي طريقه يشيله...

يوم دخل علي الشاب لاحظت انه لابس قفازات وسلم علي وهو لابسهن ويوم حاولت معه ابي اشوف يده وبقع الخال

رفض وقال انت استشاري وبس

قال الدكتور للشاب انا ما اقدر اساعدك الا اذا شفت الحاله بعيني.. اقتنع الشاب بصعوبه

وشال القفازات....قال الدكتور: شفت شي عجييييب

مكتوب ببقع الخال على يده اليمين بس اسم بنت...فلانه بنت فلان

يقول انا احسبه بالبدايه مكتوب بخط يد او وشم لكن يوم دققت فيه طلع فعلا دم جامد او مثل ما يسمونه بقع خال....

استغربت وسألت المريض كيف جاك هالشي هل هو من الولاده..

(الدكتور يقول توقعت انه ولد غير شرعي او من هالقبيل واسم امه مكتوب على يده من يوم ولد)

لكن الشاب رفض يتكلم... ويوم حاول معه الدكتور وقاله استنتاجه انه يمكن هذا اسم امه

وانه ولد غير شرعي واستفزه)

عصب الشاب وبكى وقعد يقول القصه للدكتور..

قال الشاب ودموعه تنهمر : عرفت بنت بنفس عمري عن طريق الهاتف و صارت بينا مكالمات على مدى 8 شهور

وثقت فيني البنت وقالت لي اسمها كامل وتعرفنا على بعض زين...

ويوم من الأيام طلبت منها اننا نتقابل بأحد الأسواق والبنت رفضت رفض كلي وصرت اترجاها

على مدى شهر مافيه فايده البنت اصرت انه ما تقابلني طفح فيني الكيل وهددتها اني افضح اسمها

لو ما قابلتني فرفضت وقالت انه عذابه خير له من انه تقابله

وفعلت فعلتي ونشرت اسمها بين اصحابي وكتبت اسمها على احد الجدران فلانه بنت فلان...

بعدها بأسبوع او اسبوعين ظهرت البقع على يدي وما كانت بقع....خط عادي كأنه مكتوبه بخط اليد

وانكتبت على يدي بالضبط نفس الخط اللي كتبته على احد الجدران...

وانا نادم على اللي سويته وودي لو اتخلص من يدي بأي طريقه..

الدكتور: نعم انت غلطت مالك اخوات تخاف ان يفعل بهن مثل ما فعلت انت ببنت فلان

إللي مكتوب اسمها على يدك.؟

ولم يستطع الشاب نطق كلمه واخذ يجهش بالبكاء...

الدكتور يكلمني الآن: بعد كذا حولته على مختص لليزر والحروق

واتفقوا على موعد ويوم راح الأسم اللي مكتوب على يد الشاب.. ارتاح نفسيا ونام في المستشفى على

احد الأسرة بعد هالتعب النفسي

لكن يوم صحى رجع على يده الأسم مثل ما كان عليه قبل العمليه....

وحاولنا مره ثانيه وثالثه تبقى بعد العمليه مثل الحروق ومن بكرا ترجع مثل ما كانت بعد العمليه...!!

قلنا له انه مافيه علاج ثاني غير المراهم وانه راح تاخذ وقت طويل الين تختفي..

(الدكتور:حنا عارفين انه مافيه فايده من المراهم لكن ما نبي الشاب يتعب نفسيا ويجيه شي).

وكل شهر يجي هالشاب يراجعني ويقول ما فاد المرهم وانا اقول له الصبر زين..

ونصحته بأحد المرات انه يكلم البنت اللي نشر اسمها ويروح يمسح الاسم اللي كتبه على الجدار...

فعلا راح مسح الاسم اللي على الجدار وكتب بداله سبحان الله وبحمده سبحان الله العظيم...

ويوم كلم البنت بعد جهد لأنها ما كانت تبي ترد عليه... وقال لها القصة ..

والبنت لأنه ما وصل لأهلها قصة انها كانت تكلم فلان واسمها مكتوب على احد الجدران

وانه هالشاب مسحه وكتب بداله تسبيح وتحميد الله..

نصحته انه يتوب ويروح لمكة ويدعي لها و لنفسه... ويمسح اسم البنت اللي على يده بماء زمزم

خلال اسبوع او إلين يروح الأسم...

وفعلا الشاب سوى اللي قالته البنت وقعد بمكه بعد كل صلاه يمسح الأسم على يده بماء زمزم

وخلال 10 ايام يقول الشاب للدكتور انه سبحان الله.. والله الأسم انمسح بعد صلاة الفجر من يدي

مثل ما ينمسح الحبر من اليد اذا جاه ماء...

والدكتور يكمل كلامه يقول ومن ذاك اليوم

(قاطعته انا: متى هالسالفه؟)

قال: من 4 سنوات تقريبا..ومن ذاك اليوم وهو كل شهر يزورني مرة وقال لي إنه تزوج البنت

اللي حاول يفضحها بعد ماهداه الله وله منها ولد وبنت..وهو الآن يعمل بهيئة الأمر بالمعروف

والنهي عن المنكر بالمنطقه اللي يسكن به..


إن الله يهدي من يشاء



(( منقووول ))

__________________

أذا دعتك قدرتك على ظلم الناس
فتذكر قدرة الله عليك