يالعنبوها لحظت(ن) هزّت القاع

[كميّخ الهاجري]

السلام عليكم ورحمة الله وبركاته.




اليكم هذه المتواضعه وأرجو أن تنال على رضاكم.

قلبي من الأوجاع طفّى شموعه=والكبد فيها من غثاها تمزّاع
عيني بعينه يوم هلّت دموعه=لاعادها الله لحظت(ن) هزّت القاع
أقفى ورجلي في محلّي جزوعه=والعين كن في داخل العين لمّاع
سهرت لين الصّبح بيّن طلوعه=مع خياله بسّ ماني بطمّاع
عزّاه لامنها طرتلي اطبوعه=أضحك ودمعي يسبق الضحك ملتاع
حكيه خفيف وفيه نفس(ن) قنوعه=وماهو من اللي للمطافيق سمّاع
وإليا نظرت ابعينه ألقى دروعه=متحاميه قلب(ن) عليه الزّمن لاع
اقهوته الشّريان وقلبي قدوعه=وصفّة فناجيلي من الويل صنّاع
أنا آدري إنّي ساكن(ن) في ضلوعه=وهو بعد له مسكن(ن) بين الاضلاع
حالي عقب فرقاه ياويش نوعه=مدري كآبة نفس وألا العقل ضاع
وهذا الزّمن لابدّ نمشي بطوعه=لازم نطيعه كانه أبطى ولا طاع
واللحظه اللي هلّ فيها دموعه=يالعنبوها لحظت(ن) هزّت القاع