جمعت الغلا لكن غلانا بصدك راح :؛:؛:؛: كما النود لاهبت على السوم من قبله

[سعد بن سريّع]

من القلب وارجو ان تصل الى القلب

هني القدم لا داج في خايع ٍ صحصاح = يشوقه هوا الغربي ليا هب من قبله
بلا صجة العالم ولا به بزر وصياح = ولا عوّد لبيته قد الكبد مندبله
تضيق المدينه بالمعنّا ولا يرتاح = مدام الخواطر جوها منقطع وبله
خذا سجة ٍ عن عالم الكاذب المزاح = جهام الصدور اللي لقاها بلا قبله
صباحه على حس العصافير يا فتاح = تسبح لخالقها وهو عانق القبله
قضى الفرض في جو ٍ تجلت به الارواح = سمت بالدعا في ماطر ٍ منتعش ربله
وذا بهر الدله وذا يفهق المفواح = وذا بالخلا سارح ويتبع هوا ابله
عذاب الخلا لامن ذكرتك وانا مرتاح = كما اللي بحلقومه طرف موس ناشب له
ليا جيت في ذروة مراحك وقلبي صاح = صياح البزر عوج النصايب تنصب له
على الرجم يا عاشق تسج القدم سواح = تعوّد على بيت ٍ على الرجم كاتب له
تقول : الوفا بيت ٍ يعاند هوا الارياح = متون الغلا تسند عواميده وحبله
كذب خافقك ولا كذب خافق النزاح = حسافه عذاب الحب ما كنت حاسب له
لعل وعسى منهو وسم خافقي بجراح = سمح خاطره يومه تعاقب على نبله
جمعت الغلا لكن غلانا بصدك راح = كما النود لاهبت على السوم من قبله

مع تحيات الغناوي ,,,