((السيف من جور الزمن صابه ثلوم..)) ((جتك القوافي كنها بارق غيوم..)) لمنصور ابن منيخر

[عــقــاب]

جتك القوافي كنها بارق غيوم=ولاّ كما مخزون بيت النحليا
فيها من الحاضر سواليف و علوم=عن ما جري يا شيخ و اللي حصليا

قصيدة اعجبتني لمنصور ابن محمد ابن منيخر..

عزي لمن رافق مقاريد و رخوم=سود القلوب اللي من الحقد مليا
اللي سوالفهم كما ريحة الثوم=يغلون من طيب الأجاويد غليا
من بينهم كنّي غريب من القوم= و هذي سوات اللي نواياه عليا
وين الرجال؟؟ اللي مشاكيل و قروم=مثل الحرار اللي براس الجبليا
شقر الحرار ولا يقرب لها البوم=ولا هيب تنزل فوق حدب السهليا
مثل الذي جنسه مع الناس معدوم=صادق ولا من قال هرجه فعليا
ابو محمد طيب الراس شغموم=وافي ولا من غبت عنه أتصليا
يا خوك عيني حاربت لذة النوم=و على السهر يا خوك صعب أحتمليا
لا يا فهد قلبي له أيام مهموم=و أنا على الله ثم عليك أتكليا
أشكي و كنّي ساري الليل منجوم=ولا يشيل الحمل كود الجمليا
أمن الكسل كني لي أيام محموم=لكن لا شفتك يروح الكسليا
يا شيخ ويش الراي ؟؟ في جيلنا اليوم=ويش الحلول الصايبه و العمليا ؟؟
الحر هذا الوقت ما يدرج الحوم=و البوم في قمّة جبلها نزليا
و السيف من جور الزمن صابه ثلوم=حتي الكديش اليوم شاش و صهليا
ولا نيب من رفقة هل الطيب محروم=مثلك يكفي لو ضربت المثليا
و أدري بصدقان الرخي فالرخي كوم=و يا قلّهم يا شيخ وقت الصمليا
إن جا نهار ٍ فيه همّات و عزوم=فيهم علي ما قيل خاب الأمليا
صحيح للعالم تقاليد و سلوم=غير الحثالة من صحبها حثليا
و الناس تكره من به الكبر والزوم=مهذار وجهه ما يعرف الخجليا
و ليا دعيته يقعد شوي و يقوم= و إن سمع له هرجه لغيرك نقليا
قلته و أنا ماني على اللاش ملزوم=الأرض للطيب وسيعه و خليا
لا صرت لا ظالم ولا نيب مظلوم=ما همّني هرجة عذول ٍ عذليا
و شرواك من روس القبايل معي دوم=كم واحد ٍ لا غبت عني سأليا
ولاّ الردي من رافقه يلحقه لوم=أدنات كلمه منك صد و زعليا
لو كان يملك مال كامل و جمجوم=فرقاه فوق الكبد مثل العسليا
ولا خير في رجل ٍ بغيض ٍ و مذموم=اللي ليا جوه الطراقي بخليا
امن البخل وده تروح السنه صوم=همّه علي الدنيا يصرّ الهلليا
جتك القوافي كنها بارق غيوم=ولاّ كما مخزون بيت النحليا
فيها من الحاضر سواليف و علوم=عن ما جري يا شيخ و اللي حصليا
و الختم صلي الله علي خير معصوم=كسّر صنم مكه و أزال الجهليا

و سلامتكم ..

منقووووول ..