زفرات النحور

[شبيب ابن شبنان]

السلام عليكم ومساكم الله بالخير

اتمنى ان يحوز هذا النص على شي من اعجابكم

ما علـى مثلـي يخفّـون الامـور = مـن يخفّـون الامـور وماتبـيـن
شاعرِ وان قلت وما اجيب القصور = أطرق القاسي على القاسـي يليـن
وأرقب الايـام وآحاتـي النشـور = واتفكّـر فـي بـلاد المسلمـيـن
وأطلب الغفران لاصحاب القبـور = واتعلّـم مـن كـلام الصالحـيـن
وأتمثّـل فـي طويليـن الشـبـور = واعشق افعـال الرجـال الطيبيـن
ومن كثر ما جاء من الايـام جـور = سجلوني فـي سجـل الصابريـن
صابـرِ والله يجيـر مـن العثـور = والحلوق اتخاف من خنـق اليديـن
بس فينـي شـي واحـد ومعـذور = أكثر اطبوعـي طبـوع العاشقيـن
يبني الليل لقلـوب العشـق سـور = ويتحاشـى عـن قلـوب الدالهيـن
السلـوم تقـول ممنـوع العبـور = والقلـوب تقـول ممنـوع الونيـن
واشهد ان لي قلب للمسرى جسور = قومه الذكـرى القديمـه والحنيـن
كل ما هوجست يـا بـدر البـدور = آتمنـى مـن جنـابـك حاجتـيـن
لي سنه ما أوحيت زفرات النحور = ولي سنه ما ذقت عـذب الرافديـن
أقبلي يـا محليّـة عمـر الزهـور = يا وجود الحال والقلـب الحزيـن
وارحبي لو كثرة عيون الحضـور = ما علينـا مـن عيـون الحاسديـن
في الهـوى ماكنـي الا دكتاتـور = اعشقك وأكـره كـلام المعجبيـن
واحدِ مثلـي يعشقـك مـا يبـور = وانتي اللي قلـت لـك تستاهليـن
وان رحلتي قمت اغرف من البحور = وآتذكـر نشـوة السـر الدفـيـن
وان هجرتيني وأنا أعـد الشهـور = أهجرك واستنكر الفعـل المشيـن
ولو سكنتي في عظيمات القصـور = ولو ظلمتيني على طـول السنيـن
القلوب تعيـش ويمـوت الشعـور = قد نسينـا قبلـك القـدس وجنيـن