قنبلة من قنابل الشعر: للشاعر . سالم بن جخير

[طلال بن قطام]

يقول من راسه على الشعر يحداه=شاعر ومتمكن وكاتب وراوي
لاجاب بيت الشعر كنك تنقاه=من شعر ابو الطيب وشعر الخلاوي
والشعر له دعوا لاجا دعواه=مثل الفتاوي عند راع الفتاوي
لاكن ياصبري على القاع صبرا=كني مع الجن المسمى مخاوي
من فرحتي في سيدي لاعدمناه=ماباقي الا اطير مثل النداوي
سلام ياسيفي نهار الملاقاه=لاقلت الحيله وجات العزاوي
اهل الكرم واجد وكلن ويمناه=واطيبهم اللي بالعطايا رهاوي
اما ذبح مفرود ولا ذبح شاه=وانت كرمك يعتق رقبة الجلاوي
الذيب مثلك لا سراه بان مسراه=على النقا يسري وياتيك ضاوي
والطيب اليا طاب من طيب مجناه=وانت العريب اللي على الطيب حاوي
انت العزيز اللي طروقك مخلاه=يتيهبك من دل ويدل غاوي
مالك طريق الا على العز والجاه=بالفعل ماهو بالحكي والمناوي
جدك معزي طيب الله مثواه=اللي على الشداد قادر وقاوي
والله يالولا الله تعالى ولولاه=مالتم شمل اهل المدن والشواوي
وابيك خيال المهار المسما=حلال صعبات العقد والدعاوي
النادر اللي لو تعدد مزاياه=تلقا الخصال النادره بالتساوي
وعمك ملكنا اللي اليا جيت تنخاه=ياتيك متحزم وصامل وناوي
لو ان كل الناس مثله وشرواه=عاش الفقير امن وشابع وراوي
وخالك غرز في صدر عجلان شلفاه=الين راح ولا لقاله مداوي
انشهد انه عزوة اللي تعزواه=لاتطوحن اهل الغطي بالغطاوي
ماقلت لك مالك حلاياه ولا شباه=اشبح سما ويحول النجم هاوي
انتم هل العوجاء ولابا مراوه=شرب المصايب مثل شرب القهاوي
قد قالها اللي كل ماحل طرياه=هبت هبوب النود عنبر وجاوي
اهل القنا واهل السيوف المحناه=اخوان نوره مبعدين الهقاوي
انتم لنا مثل الحصون المبناه=اللي ترد السيل لاجا نحاوي
وحنا لكم من مبتدا العمر لاتلاه=نارد حياض الموت مثل الرواوي
كبيرنا لا شاش ياتي من اقصاه=لادقت طبول القشر والبلاوي
يطرب على صوت الفشق كل موحاه=ماهوب يطرب للقنا والقناوي
وصغيرنا يمشي ولا يحسب اخطاه=ولاهوب لايرحم ولاهوب ياوي
واللي يخون الدار يمسك بعلباه=ويكدشه علباه ويطيح ثاوي
لن الغدر ماكل رجال يرضاه=ولا اظن يرضاه الحيا للحياوي
هذا وطنا ياعسى الروح تفداه=انا فداويله وغيري فداوي