ياحيف ياعيال الرّجال

[كميّخ الهاجري]

السلام عليكم ورحمة الله وبركاته.



إليكم هذه المتواضعه وأرجوا ان تنال على إستحسان ذائقتكم الشعريّه.

ببتدي باسم الله المعبود بالقول الثقيل=ربّنا اللي عالمٍ قول البشر وافعالها
بعد ذكرت الله أبذكر علم ثابت مايميل=وأبعسف الفكره وأنوّخها وأشد اعقالها
شاعر وإلى سقت المعاني ما أسوق ألا الجزيل=أمّا يحضّر عمّها وألا يحضّر خالها
أجي على الطرق القصيّر أو على الطرق الطويل=والمهره الصّفرا تحت يدّي وأنا خيّالها
ماني بدوّر صرّة المال الكثير أو القليل=وألا آترجّى خزنةٍ قد سكّرت باقفالها
ألا آترجّى شهرةٍ بين الرّجال اللي تشيل=جزل العلوم الغانمه ومطيّب الله فالها
هذي فقط نبذه عن الموضوع وإسمع يالعميل=لا واخساره شجرةٍ ماهي تمدّ اظلالها
بعض البشر ذمّته ذمّه واسعه وأكبر دليل=البنت تنخا والرّجل يضحك ويسلب مالها
هذا بدل ماينتفض وايشوش وايسلّ الصّقيل=وألا ايتحامى دونها ويردّ كيد أنذالها
ياحيف ياعيال الرّجال اللي بهم علمٍ شكيل=من عقب صفو ادلالها ماباقي ألا احثالها
ياليتني قد مت قبل أشوف ذا الوضع الذليل=اللي تشيخ البوم وتشيّخ علينا اعيالها
يسقيك ياوقتٍ مضى فيك الصّبر عوّد جميل=تبقى العذارى آمنه إليا احتمت برجالها