تواصيف المهاوي ..!

[سعود الجوفان]

مساء الخير للجميع

آخر ماكتبت من القصايد

أتمنى تعجبكم


؛’؛

حزين ولا على الدنيا رجاوي=من الفرقا تبلتني بلاوي

عليها كل يوم اجر ونّه=ولا ضنيت ترجعها المناوي

جمالٍ ياعرب ماشفت غيره=جمال الروح والشكل متساوي

أبوصفها ولا ادري كيف اوصِّف=عجزت القى تواصيف المهاوي

مِبيسِمْها مثل جمرٍ توقَّد=ليا مِنْه ابتسم ترف وحياوي

ولامنَّه نطق يازين نطقه=يزيِّن بالدلع طعم الحكاوي

وعينهٍ عين قِرناسٍ مصقّـر=سبر من ماكره للطلع ناوي

جبينه كل مالدِّيت صوبه=جهر عيني مثل شمس الضحاوي

وعنقٍ كَنْه عنق خشيف ريمٍ=جفل من صوت بارودٍ دماوي

جدايلها لك الله ليل دامس=ومنكوتٍ كما الشلال هاوي

وعودٍ ضامرٍ لمن قفيته=تِطنِّب بالصياح وبالعزاوي

عسى من حال دون الزين يلقى=صوابٍ ما يعيِّن له مداوي

وهذي حالتي في كل ليله=كما ذيبٍ على الضلعان عاوي

ولكن كل ما جرِّيت ونّه=دريت إن ماعلى الدنيا رجاوي

وسلامتكم

؛,؛

أخيكم / سعود الجوفان