يامحطّ إهتمامـي ،

[محمد المسعري]

السلام عليكم
أتشرف بإنضمامي لهذا الصرح ،
وشكراً لاخي فهيد بن عصيدان على الدعوه
متواضعه واسمحوا لها بالمرور /

يوم سلّمت .. بيّنت الحزن في سلامي ،=انتظرت إتسائل : ضيقتي .. ويش هي له
جيت ضامي لوصلك ،، والبلا منت ضامي=الوصل غايتي !! ولا القصيده ؟ وسيلـه
ليه قلّ اهتمامك ؟ يـا محـطّ اهتمامـي=الصبر من بعادك مـلّ .. وإنهـد حيلـه
ليه تستكثر الفرحه علـي ؟ وإبتسامـي=عاد من كثرت افراحـي ؟ تراهـا قليلـة
قل لقلبك تـرى رد المحبـه . إلزامـي=وكان مارد كـل الحـب ؟ ربـه وكيلـه
ماهقيتـك ليـا دار الزمـان إنهزامـي=وماهقيتك ليا مرّ الجفـا تنحنـي لـه
التزامك معي ماهـو بـمثـل إلتزامـي=في الولا والغلا ،، بين الخليـل وخليلـه
ساعة مفارقك ضيقة و مشهـد درامـي=يوم قلبك علـى فرقـاي عـزم رحيلـة
كل ليل آحسب فالصدر كم جرح دامـي ؟=لين ما ارقد وهذي حالتـي كـل ليلـه ؟
كيف أبنساك وأسهى عن غرامك مدامـي=كل ماطاح منـي جـرح رديـت أشيلـه
يوم فرقاك ؟ عيّـت لا توقّـف عظامـي=طحت وطاحت معاي الامنيـات الجميلـة
من بقايا اهمالـك دمـع بـان بكلامـي=وجرح فالصدر لا يشفى ولا فيـه حيلـه
خذ معك ذكرياتـي والجـروح وملامـي=خذ معك كل ماتقـدر تشيلـه ، وشيلـه