من قال حب البنت كذب وسواليف ...!

[زود الغـــــــــــلا]

يسعد اوقاتكم..




(تمتعـــــــوا..)

من قال حب البنت كذب وسواليف ..!
وشلون والنيران تشعل بجوفي ؟

إن كان حبي له هروج وتخاريف ..
ياكيف عاد الحب بأقسى الظروفي ..!

عيونه سفن.. ورموشهن المجاديف ..
ماهو غزل ياناقدين الحروفي ..

وجهه بحر يطري عليْ أقرب السيف ..
واخاف من موج البحر مايروفي ..!

هو البحر.. هو البحر سره مخيف ..
يشـــدني لونه ووسطـه حتوفي ..

يمدلي يمناه وآقـــول يـــا حيف ..
مهوب طبعي يلمسون الكفوفي ..

بنت البدو.. والحب عيب وتكاليف ..
والموووت من هرجة عذولٍ نكوفي ..

غصبٍ عليْ الحب ماهوب بالكيف ..
وشلون بختار العنا والحسوفي ..!

حب الشرف مهوب حبر ومظاريف ..
مايلحق الشمس العظيمه كسوفي ..

يانـــاشدٍ عني ترى حالي صخيف ..
عقب الهوى عرفت نقش الحروفي ..

وياللي تبي للحب وصفٍ وتعريف ..
تعال شـــوف الحال.. تكفي وصوفي ..

وياعزوتي ليه الأسى والتحاسيف ..
ليه اندفن حيـه وعيني تشــوفي ..؟

دخيلتك يــارب ابن آدم ضعيف ..
لاقلت حقي قلـتوا القـــبر يوفي ..

لاتجبرون الروح غصبٍ وتخويف ..
ماشوف غيـره لاتـقــولون شوفي ..

صديت عن غيره ولي قلبٍ معيف ..
لي كيف.. لوْ تـدرون صعبٍ عيوفي ..

هذاك طلق حجاج ومكرّم الضيف ..
شروى الوجيه الطيبه ومعـــروفي ..

يسوى كثير أزوال.. فــ قلوبهم زيف ..
بنطر خــيوله لوْ يطـوّل وقـوفي ..

إن كانها بالعز فالقلب له ريف ..
وإلا الحـرام بعيد عــنّه طــيوفي ..

إما نهايتها دفوف وغطــاريف ..
وعـــلوم الرجال مرقصين الســيوفي ..

وإلا فراقٍ يرفع الراس تشــريف ..
لابــو حـــياةٍ لـلـرذيـلـه تحوفي ..