فهد بن جطلي+منصور بن محمد(البركان الثائر)

[سماوي بن نجم]

السلام عليكم ورحمة الله وبركاته

ارسل والدي فهد بن جطلي بن ورده هذه الابيات
الى الشاعر منصور بن محمد بن منيخر ((البركان الثائر))

بالله يامنصور قلي وش الحل=فالخمه اللي كل شراً تثيره
لسابة العرقوب في هجعة الكل=دوارة الناموس كذب وخشيره
فقلوبهم كرهاً وفصدورهم غل=لهل العلوم الكايدات العسيره
مافيهم اللي يكرم الضيف لا حل=من عقب غيبات السنين المريره
ومافيهم اللي لانخيته تمزهل=ياهملالي يارجال(ن) شهيره
وراعي النمايم والحكي ياعسى وعل=تنصك في وجهه ابواب(ن) كثيره
ارسلت لك مكتوب شطره على ال=والشطر الأخر يالسنافي بغيره
لاشاكي(ن) جوعاً ولا شاكي(ن) ذل=بس الليالي يابن الأخي مغيره

وهذا هو رد ابومحمد

يا فهد بن جطلي ترفق بمن زل=وايامنا مثل الرحى المستديره
والناس هذا الوقت تطلع وتنزل=والله يستر فالسنين الاخيره
لو قلت كلمة حق لاخيك قم صل=كنك مولع وسط صدره سعيره
والنذل لو تفرش له الشايكه زل=يبقى السواد المجتمع في ضميره
يرضى عليك شوي وشوي يزعل=وهذي سوات اللي يدينه قصيره
ولا كل من هام المراجل تمرجل=ولا كل رجال(ن) يحفظ السريره
اصبر على حكي الضعوف وتحمل=وحسناك في بعض الهلايم بريره
وانا ادري انك تعرف الدرب وتدل=وبعدك عن الانذال يالقرم خيره
جاوبت لك يلي عن الحل تسأل=لو كان في صدري علوم(ن) كثيره

وسلامتكم

نقلت لكم هذه الابيات بعد أخذ الاذن من كلا الشخصين من باب الادب

هذا واتمنى ان تحوز على اعجابكم