مساجله ماسنجريه بين " الوضحه & غصن الذهب .. "متجدد

[الوضحه]

بسم الله الرحمن الرحيم

السلام عليكم ورحمة الله وبركاته


كيف حال الجميع.. اربكم طيبين..

بقول لكم قصة بداية هالمساجله قبل كل شي,,

في يوم من الايام,, وفي تالي الليل ,,

لمن كان جهازي مخرف لانه مبطي عن هجٌاده الا وهو " الفورمات "

فكان بس يعلق..

الوكاد مالكم بالطويله..

وتدخل علي اختي " غصن الذهب "..

رحبت فيها.. ماردت علي..

طنقرت طبعا.. قلت وشقومها تسفهني..

والله لاسفهها

شوي والا البنت تدعيني.. وانا عادني مطنقره..

وتدعيني.. واناعااادني سافهه..

شوي كسرت خاطري .. قلت برد عليها..

الا يعلق الماخوذ عندي.. والمره تدعي تدعي محدن حولها..

الوكاد.. يوم ربي عانه وحن علي الا البنت عطتني ابياتها المحقه..


وابتدينا..

غصن الذهب:

جعل وضحه تاخذ خبيل وحافي=تختلط خباشته ويّا خباله
ان رضى ياتيه بالعقل اختلافي=وان زعل اووما عليها في عقاله
صوتت لي والعرب عندي اصطفافي=وجيتها اجري وفي ايدي بياله

الوضحه:

جعل فكرش بالقصايد للجفافي=دام ذا حكيش علي كله هباله
وجعل ترجع لش دعاتش بالخلافي=والماسينجر جاه من ربي ظلاله

غصن الذهب:

اجل جعلش تاخذين ابن الخرافي=ويكتب الدنياا لش وينسى عياله
وتقحص سكونش مع اول خلافي=وتذبحينه ثم تولين بحلاله
وامتلك فوتو لجرمش واعترافي=وترضخين الا طلبتش نص ماله

الوضحه:

انتي وشقومش علي عقلش خفافي=جبتي الدنيا على راسي عجاله
اربضي ثم ابطحي يدش وكافي=لقلب الدعوه خباثه مع نذاله
اركدي يابنت وخليها عوافي=دام نفسي طيبه حد الثماله

والبقيه تأتي..