ما يروي الضامي قصير الحبالا

[محارب يام]

ما يروي الضامي قصير الحبالا
=================
محمد مذكر المغيبي العتيبي



من كثر ما ينقص من الهرج ويزيد

كثر الكلام اللي شبيه الخيالا

وشوش رادار المعرفة والمناقيد

واستبسل اللي فالمهد لا يزالا

وقامت تبرك للحمول المفاريد

ونقال عسرات الحمول استقالا

ودقت علوم دون سابق مواعيد

قامت على وجه البسيطة توالا

يركض بها الهراج ويقطع القيد

ومن حيث لا يرفع له الصوت مالا

تضيق منه صدور وتضيق به بيد

وضاق الفضاء الواسع وصم الجبالا

ولا عاد يعرف للحقيقة مواريد

من واقع الفوضى وكثر الجدالا

واصبح ضعيف العرف في نفسه يشيد

العارف الفاهم كريم السبالا

وقت الرخاء ما يتقارن بابو زيد

ويا قوم لن جاء للزناتي مجالا

علاجه انك تترك مجادله حيد

وجميع ما قاله تحطه شمالا

وإلا على قول الرجال الصناديد

لا تجرحون شعور ذيب العيالا

في ليلة عنده مثل ليلة العيد

متجول ما بين قيل وقالا

وادع الله انه يشفي ابن الاجاويد

يمكن يجيب دعاك رب الجلالا

وان طال ليله يمدح الذات ويعيد

اكيد من سقمه شفاه استحالا

خله يواصل رحلته دون تعقيد

ناقص ويبحث عن وجود الكمالا

لا حاسب شرهه ولا كاسب فيد

ولا دافع بالطيب ربع الريالا

ما يشبع الجايع عراش العماريد

ولا يروي الظامي قصير الحبالا







دمتم بود..............................